@Snoreyn ники остида танилган италиялик дизайнер Жузеппе Спинелли LetsGoDigital ресурси учун Galaxy S21 FЕ смартфонининг сифатли рендерларини тайёрлади, деб хабар беради IXBT.
Samsung Galaxy S21 FЕ модели S21 линейкасидаги бошқа смартфонлардан камералар блоки орқа панел рангига бўялгани билан ажралиб туради. 2020 йилда Samsung Galaxy S20 FE'ни Full HD сифатни қўллаб-қувватлайдиган ингичка дисплей ва пластик орқа панел билан жиҳозлаган эди. Афтидан, Galaxy S21 FE'да ҳам ушбу тажриба қўлланилган.
Тахминларга кўра, янги модель ўтган йилгидан бироз кичикроқ бўлади. Қурилмага 120 герци янгиланиш частотасига эга Full HD+ сифатни қўллаб-қувватловчи 6,4 дюймга тенг Super AMOLED-дисплей ўрнатилади. Дисплей ўлчами бўйича Galaxy S21 FE модели S21 (6,2 дюйм) ва S21+ (6,7 дюйм) ўртасидан жой олади. Бундан ташқари, телефоннинг ҳимоя даражаси IP68’ни ташкил этади.
Маълум қилинишича, Samsung АҚШда Samsung Galaxy S21 FE'нинг бир кристалли Snapdragon 888 базасида яратилган версиясини, бошқа бозорларда эса Exynos 2100 тизими ўрнатилган версиясини сотади. Смартфон икки хил вариантда тақдим этилади — 6/128 ГБ ҳамда 8/258 ГБ.
Samsung Galaxy S21 FЕ Android 11 операцион тизимида ишлайди, аккумулятор сиғими 4500 мА/соат етади ва 45 ваттли тезкор қувватланиш функциясига эга бўлади.
Шу билан бирга, янги модель 12 мегапикселли кенг бурчакли, 12 мегапикселли ўта кенг бурчакли ва 8 мегапикселли телеобъективдан иборат учталик камерага эга бўлиши кутилмоқда. Фронтал камераси 32 мегапикселлга етади.
Сўнгги маълумотларга кўра, Samsung ўзининг Galaxy S21 FE моделини 2021 йилнинг тўртинчи чорагида тақдим этади.
Аввалроқ S Pen’га эга Galaxy S21 Ultra ўзини оқламади, шу сабабли Samsung компанияси Galaxy Note’ни қайтариши, Samsung’нинг букланувчан «гармошка-планшет»и янги тасвирларда намойиш этилгани тўғрисида хабар берилганди.
Изоҳ (0)