Ўзбекистонда 6—8 июль кунлари Эрон ҳудудларидан иссиқ ҳаво массаларининг кириб келиши туфайли жазирама иссиқ кучайиши кутилаётгани, ушбу кунларда ҳаво ҳарорати иқлимий меъёрлардан 5-8 даражага юқори бўлиши маълум қилинганди. UzAuto Motors компанияси аномал иссиқда машиналарни қандай сақлаш тўғрисида кўрсатма берди. Таъкидланишича, тўғридан-тўғри қуёш нурлари остида бўлган автомобилда ҳарорат 100 даражагача кўтарилиши мумкин.
Компаниянинг маълум қилишича, юқори даражали ҳарорат ва қуёшнинг ультрабинафша нурларидан автомобиль ойнасининг муҳрлари, фара ва чироқларнинг қопқоқлари, асбоблар панели, ички қопламалар, ташқи қопламанинг пластик қисмлари қизийди, хиралашади, ёрилади ва бузилади.
Бундай нохушликларнинг олдини олиш ҳамда автомобилни қуёш нуридан ҳимоя қилиш учун энг аввало, ҳаддан ташқари қизиб кетган автомобилда узоқ вақт қолиб кетишга йўл қўймаслик тавсия этилади. Ҳайдовчи автомобилга ўтирган заҳоти уни ҳаракатлантиришга шошилмаслиги керак — яхшиси, ойналарни очиши ва двигателни ишга тушириб, бир неча дақиқа кутиб туриш лозим. Мазкур қоида, айниқса, тўқ рангли автомобиль эгалари учун жуда муҳимдир.
Жазирамада автомобиль салони бир неча дақиқа ичида ниҳоятда юқори ҳароратгача қизийди. Фожиали ҳодисанинг олдини олиш учун ҳеч қачон болалар, қариялар ва ҳайвонларни автомобиль салонида, ҳатто ойналари очиқ бўлган тақдирда ҳам қаровсиз қолдирмаслик тавсия қилинади.
Автомобилни ёпиқ автотураргоҳларда ёки соя жойда қолдириш лозим. Аммо ҳамма ҳам бундай имкониятга эга эмас, албатта. Бундай вазиятда олд ойна учун қуёшдан ҳимояловчи экран сотиб олган маъқул (ҳимояловчи экран бозорларда 10 минг сўм туради) ва иложи борича ойналарни ёпиш лозим: бу чораларнинг барчаси салон қизиб кетишининг олдини олади, унинг пластик ва резина элементларини деформациядан ҳимоялайди.
Агар машина узоқ вақт кўчада қолдирилган бўлса, унда автомобилнинг махсус чехолини сотиб олиш керак, у қишин-ёзин хизмат қилади. Келтириб ўтилган воситалар бўлмаган тақдирда автомобилни қуёшга тескари, олд ва ён ойналарига қуёш нури тушмайдиган қилиб қўйиш тавсия этилади
Автомобилнинг суюқлик даражасини кузатиб бориш
Бу ойна тозаловчи, мой, фреон ва бошқа шу каби суюқликларга тааллуқли. Ёзда двигатель босими ҳаддан ташқари ортади ва уни етарли миқдорда мотор мойи билан таъминлаш ниҳоятда муҳим.
Ёзнинг иссиқ кунларида автомобилдан интенсив фойдаланиш билан мойни тез-тез алмаштириш кераклигини унутмаган ҳолда, уни вақти-вақти билан бажаришга ҳаракат қилиш керак. Радиаторга дистирланган сув эмас, махсус антифриз қуйиш лозим. Ёз мавсумида тормоз суюқлигини мунтазам равишда ўзгартириб туриш, шу билан бирга, сизга тақдим этилган сервис китобидаги тавсияларга амал қилиш керак.
Ёқилғини тўла тўлдирмаслик керак
Ҳаддан ташқари иссиқда ёқилғини ёқилғи баки тўлгунча тўлдириш керак эмас. Ҳарорат кўтарилганда ёқилғи кенгайиб, бакдан тўкилиши мумкин. Тўкилган ёқилғи автомобиль рангига ёки корпуснинг коррозияга қарши ҳимоя қилиш қопламаларига зарар етказиши мумкин. Бундан ташқари, оқиб тўкилган ёқилғи атроф-муҳитга зарар етказади ва ҳаттоки ёниб кетиши ҳам мумкин.
Шиналарни тўғри танлаш лозим
Қишки шиналарни ёзгисига алмаштириш керак. Асфальт иссиғида улар емирилиб, йўлда ҳаракатланиш учун тавсия қилинмайди. Ёзги шиналар қаттиқлигининг хусусиятлари бор. Чунки иссиқ ҳаво ҳароратида резиналар юмшаши мумкин. Шуни унутмаслик керакки, жудаям юқори ҳароратда асфальт қизиб, юмшайди. Ёзги шиналар хавфсиз тормозлаш учун махсус протекторга эга бўлиб, йўлда сувдан ҳимоя қилиш ва ёқилғини тежаш имконини беради.
Буюмлар автомобилда қолдирилмасин
Ёз мавсумида автомобиль салонида газли ичимликлар, тиббий буюмлар ва дори воситалар, шунингдек, қуёшдан ҳимояловчи кремлар, кўзойнаклар, тур хилдаги суюқликлар ҳамда балончикларни, айниқса, электрон қурилмаларни сақлаш тавсия этилмайди. Ёзнинг жазирама иссиғида автомобиль салонида қолдирилган энг оддий буюм ҳам хавфли ҳисобланади.
Қуёш нуридан кўзни асраш керак
Қуёш нури ҳайдовчини кўриш қобилиятини пасайтириб, бир неча сониялар ичида йўлда нохуш ҳодисани келтириб чиқариши мумкин. Шу сабабли қуёшдан сақловчи кўзойнаклар тавсия қилинади. Улар йўл-транспорт ҳодисаси содир этилишининг олдини олади.
Аввалроқ Ўзбекистонда аномал иссиқ туфайли 9 июлгача поездлар ҳаракати жадвалига ўзгартириш киритилиши мумкинлиги, Чотқол қўриқхонасидаги қарийб 1 гектар ер майдони аномал иссиқ туфайли ёниб кетгани тўғрисида хабар берилганди.
Изоҳ (0)