Фарғонада эри билан жанжаллашиб қолиб, ўзини Катта Фарғона каналига ташлаган 22 ёшли аёлнинг жасади орадан уч кун ўтиб топилди, деб хабар бермоқда «Дарё» мухбири.
Маълум бўлишича, 2021 йилнинг 4 июль куни соат 16:30 ларда Тошлоқ тумани «Кўлариқ» МФЙ, Беклар кўчасида яшовчи 1999 йилда туғилган фуқаро Б.М. Катта Фарғона каналининг Тошлоқ тумани, «Хонақа» МФЙ ҳудудидан оқиб ўтувчи қисмида чўкиб кетган.
Аниқлик киритилишича, фуқаро Б.М. турмуш ўртоғи С.Х. билан ўзаро жанжаллашиб қолган. Шундан сўнг жаҳл устида яшаш хонадонига яқин бўлган Катта Фарғона каналига ўзини ташлаб юборган.
Вилоят фавқулодда вазиятлар бошқармасининг маълумот беришича, 22 ёшли аёлни қутқариш учун шу куннинг ўзида махсус гуруҳ ташкил этилиб, қидирув-қутқарув ишлари олиб борилган.
Қутқарувчиларнинг саъй-ҳаракатлари билан 7 июль куни тушдан сўнг марҳуманинг жасади топилган.
Ҳозирда ушбу ҳолат юзасидан суриштирув ишлари олиб борилмоқда.
Изоҳ (0)