Италия Афғонистондан ўз ҳарбийларини тўлиқ олиб чиқди

Италия ўз ҳарбий контингентини Афғонистондан олиб чиқиш операциясини якунлади. Бу ҳақда 30 июнь куни Италия мудофаа вазири Лоренцо Гуэрини маълум қилди, деб ёзади «Интерфакс».

«Кеча (29 июнь куни) Италиянинг Афғонистондаги миссияси расман якунланди», — дея вазирнинг сўзларини келтирган Рим ОАВ. Бир неча ўнлаб италиялик ҳарбийларнинг сўнгги гуруҳи Афғонистоннинг Ҳирот вилоятидан чиқиб, Пиза аэропортига етиб келган.

Вазирнинг таъкидлашича, буёғига Италия Афғонистон ҳукуматига қўшинларисиз ёрдам беришда давом этади.

Италия Афғонистондаги НАТО миссиясининг энг фаол иштирокчиларидан бири бўлган. Мудофаа вазирлигининг маълумотларига кўра, Афғонистон ҳудудида, тахминан, 20 йил давом этган ҳарбий хизмат давомида Италия ҳарбийларининг 53 нафари қурбон бўлган, яна 723 киши жароҳат олган. Умуман олганда, бу вақт ичида Афғонистонда 50 минг италиялик ҳарбий хизмат қилган.

Июнь ойи бошида АҚШ Афғонистондан ўз қўшинларининг учдан бир қисмини олиб чиқиб кетгани хабар берилганди. Шунингдек, Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллаши ҳақида АҚШ ва Туркия президентлари Жо Байден ва Ражаб Тоййиб Эрдўғон келишиб олган эди.

Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли Кучларни 11 сентябргача тўлиқ чиқариб кетиш режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлади. Айни вақтда АҚШ давлат котиби Энтони Блинкен Афғонистондан қўшинлар чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмади.