Жонс Ҳопкинс университети маълумотларига кўра, дунё бўйича коронавирусга чалинганлар сони 181 851 597 кишига етди, шуларнинг 3 938 885 нафари вафот этди. Коронавирусга чалиниш ҳолатларининг кўплиги бўйича АҚШ (33,6 миллион), Ҳиндистон (30,3 миллион), Бразилия (18,5 миллион), Франция (5,8 миллион) ва Россия (5,4 миллион) энг олдинда бормоқда.
Ўтган бир кеча-кундузда Россияда 669 киши коронавирусдан вафот этди. Бу пандемия бошидан буён кузатилган янги кунлик рекорддир. Бундан аввалги рекорд бир кун олдин қайд этилган, ўшанда 652 киши вафот этган эди.
30 июнь эрталаб ҳолатига Россияда 21 042 кишида коронавирус аниқланди, умумий касалланганлар сони эса 5 514 599 кишига етди.
Энг кўп COVID-беморлар Москвада (бир кунда 5823 киши), Подмосковеда (2583) ва Петербургда (1503) қайд этилди.
Туркиянинг 26 та вилоятида COVID-19’нинг дельта («ҳиндча») штамми аниқланди, касалланиш ҳолатларининг ярми Истанбул улушига тўғри келади, дея маълум қилди соғлиқни сақлаш вазири Фахреттин Кожа.Жами 224 киши дельта штаммни юқтириб олган, шуларнинг 134 нафари — Истанбулда. Туркияда ҳозирча коронавируснинг дельта плюс варианти аниқлангани йўқ.
Сўнгги вақтларда бутун дунёда дельта штаммининг кенг тарқалиши кузатилмоқда. У дастлаб Ҳиндистонда аниқланган бўлиб, хусусан, юқумлилик даражасининг юқорилиги билан ажралиб туради.
Айни пайтда болалар коронавируснинг «ҳиндча» штаммига кўпроқ чалинувчандир, дея маълум қилмоқда Россия Фанлар академияси вице-президенти Владимир Чехонин.Унинг айтишича, ҳозирда Россия Фанлар академияси коронавируснинг «ҳиндча» штаммини фаол ўрганмоқда. «Айтиш мумкинки, бу штамм анча юқумли, унинг юқумлилик коэффициенти ‘уханча’ штаммдан анча каттароқ», — деди академия вице-президенти.
Аввалроқ Россия эпидемиология илмий-тадқиқот институти директори ўринбосари Александр Горелов коронавирус айни пайтда ёшлар ва ўсмирлар орасида фаолроқ тарқалаётгани, асосан, 14-29 ёш одамларда кўпроқ қайд этилаётганини маълум қилиб, бу «ҳиндча» штаммнинг тарқалиши натижаси эканини айтганди.
Изоҳ (0)