АҚШ Афғонистондан қўшинларини олиб чиқиш жараёнини бир неча кун ичида якунлаши мумкин. Бу ҳақда расмий манбаларига асосланиб, CNN хабар берди.
«Бу ҳафтадаги энг муҳим иш қўшинларни олиб чиқиб кетиш ва уларни ортга қайтариш жараёнини якунлаш бўлиши мумкин», — деди Мудофаа вазирлиги вакили CNN’га.
АҚШ президенти Жо Байден Афғонистондаги қўшинларини 11 сентябрга қадар олиб чиқишга ваъда берганди.
Шу билан бирга, маъмурият мансабдорларидан бирининг CNN’га хабар қилишича, қўшинлар расмий равишда олиб чиқиб кетилгандан сўнг АҚШнинг Кобулдаги элчихонаси ва шаҳар аэропорти хавфсизлигини таъминлашга ёрдам бериш учун мамлакатда 1000 га яқин АҚШ ҳарбийлари қолиши мумкин.
Мудофаа вазирлиги вакили эса элчихоналарни қўриқлаш ва пойтахт аэропортида хавфсизликни таъминлаш учун Афғонистондаги АҚШ қўшинларининг тахминий сони ҳозирда 650 кишидан ошмаслигини айтди.
Пентагон вакили Жон Кирбининг журналистларга маълум қилишича, АҚШ қўшинларининг олиб чиқиб кетилиши НАТОнинг Афғонистондаги «Қатъий кўмак» миссияси тугашини англатмайди.
CNN таъкидлашича, «Толибон» бутун мамлакат бўйлаб ёйилар экан, Америка разведкасининг ҳисоб-китоблари Афғонистонда ҳокимият «Толибон» қўлига ўтиши мумкинлигини истисно қилмаяпти.
Афғонистондаги АҚШ ва НАТО кучларининг қўмондони генерал Остин Миллер The New York Times’га берган интервьюсида зўравонлик ҳаракатларининг давом этиши фуқаролар урушига олиб келиши мумкинлиги ҳақида огоҳлантириб, бу эса бутун дунёни ташвишга солиши кераклигини таъкидлаганди.
Аввалроқ Афғонистон ҳукумати АҚШ қўшинлари олиб кетилганидан олти ой ўтгач қулаши мумкинлиги хабар қилинганди. Бунга қадар Америка разведкаси Афғонистон президенти Ашраф Ғани ҳукумати АҚШ қўшинларининг кўмагисиз камида икки йилга бардош бера олади, деган фикрда эди. Бироқ сўнгги пайтларда кескинликнинг кучайиши, ҳукумат кучлари ва «Толибон» ҳаракати аъзолари ўртасидаги тўқнашувлар фонида АҚШ разведкаси ўз прогнозини ўзгартирди.
Изоҳ (0)