Коронавируснинг дельта штамми туфайли тўлиқ локдаун ўрнатилган Сидней — суратларда

Австралия ҳукумати бир йилдан ортиқ вақт ичида биринчи марта Сидней ва унинг атрофидаги ҳудудларда қатъий икки ҳафталик карантин жорий қилди. Бунга мамлакатда коронавируснинг «ҳиндча» (дельта) штамми аниқлаганидан кейин COVID-19 билан касалланиш ҳолатларининг ортиши сабаб бўлди. Сиднейнинг тўлиқ локдаун ўрнатилгандан кейинги кўриниши ҳақида «РБК» фоторепортаж тайёрлади.

Австралиянинг Янги Жанубий Уэльс штатида 26 июнь оқшомидан 9 июль охиригача қатъий карантин ўрнатилди. Буюк Сидней, Вуллонгонг, Мовий тоғлар ва Марказий соҳилбўйи аҳолиси фақатгина озиқ-овқат, масофавий олиб борилмайдиган иш ёки ўқиш учун, шунингдек, тиббий ёрдам ёки очиқ ҳавода спорт билан шуғулланиш учун уйларини тарк этиши мумкин.

Сидней ва унинг атрофидаги ҳудудларда умумий овқатланиш шохобчалари фақат олиб кетиш ва етказиб бериш шаклида ишлайди, супермаркетлар ва озиқ-овқат дўконлари ёпилмайди, аммо кинотеатрлар, театрлар, концерт заллари, дискотекалар ва бошқа кўнгилочар жойлар фаолияти тўхтатилади.

Янги Жанубий Уэльснинг бутун ҳудуди бўйлаб ниқоб тақиш мажбурий этиб белгиланган. Шунингдек, транспортда ва очиқ ҳавода ўтказиладиган тадбирларда ҳам ниқоблар талаб қилинади (тадбирлар 10 кишидан кўп бўлмаган доирада ўтказилиши мумкин).

Штат спорт тадбирларини бекор қилди, 28 июндан тўйларни нишонлаш тақиқланади, дафн маросимига ташриф буюрувчилар сони эса 100 кишидан ортмаслиги керак. Меҳмонлар ижтимоий масофа сақлаб туришлари шарт— ҳар 4 квадрат метрга бир киши.

Янги Жанубий Уэльс «қизил» ҳудуд деб эълон қилинганди. Баъзи штатларда Уэльсдан ташриф буюрувчилар икки ҳафталик карантиндан ўтишга мажбур, бошқаларида эса масалан, Ғарбий ва Жанубий Австралияда Уэльс билан чегаралар тўлиқ ёпиқ.

Янги Жанубий Уэльсда чекловлар ҳудудда «ҳиндча» (дельта) штамм тарқала бошлангандан сўнг жорий этилди. Жаҳон соғлиқни сақлаш ташкилоти маълумотларига кўра, коронавируснинг Ҳиндистонда пайдо бўлган мазкур штамми Ухандаги «асл» вариантдан юқумлироқ.

Июнь ойи ўрталарида халқаро рейслар экипажларини бир аэропортдан иккинчисига етказиб берадиган автомобиль ҳайдовчисида «ҳиндча» штамм аниқланди. 25 июнга қадар Янги Жанубий Уэльсда янги штамм билан касалланганлар сонининг кунлик ўсиши 22 кишига етди. 28 июнь куни 128 кишида «ҳиндча» штамм қайд этилди.

Янги Жанубий Уэльс — Австралиянинг энг аҳолиси зич минтақаларидан бири. Штат бош вазири Гледис Бережикляннинг сўзларига кўра, «ҳозир пандемия бошланганидан бери кузатилган энг ёмон давр». Янги штаммнинг тез тарқалиши туфайли Австралиянинг бошқа штатларида ҳам чекловлар ўрнатилди. Масалан 29 июндан Квинслендда уч кунлик локдаун бошланади.

Умуман олганда, Австралияда бир ярим йиллик пандемия давомида 30,5 минг киши COVID-19’ни юқтирган, уларнинг 1000 нафардан камроғи вафот этган. Мамлакатда биринчи қатъий локдаун 2020 йил 23 мартда жорий қилинганди. Ўшанда австралияликлар учун барларга, спорт залларига, кўнгилочар тадбирларга, кафе ва ресторанларга ташриф буюриш тақиқланганди, фақат олиб кетиш ва етказиб бериш хизматлари иш олиб борган, оммавий тадбирлар бекор қилинган.