Россия Ички ишлар вазирлигининг ҳудудий органлари 2021 йилнинг биринчи чорагида 1345 нафар чет эл фуқароси ва фуқаролиги бўлмаган шахсларни депортация қилди. 2020 йилнинг шу даврида бу кўрсаткич 1139 кишини ташкил этганди, деб ёзади «Известия» вазирлик маълумотларига таяниб.
Ички ишлар вазирлиги, шунингдек, 2021 йилнинг беш ойида 27,8 мингта ишлаш рухсатномаси ҳамда 538,7 мингта патент берилганини хабар қилди. Жамоатчилик палатаси қонунни бузган муҳожирларни чиқариб юборишни тўғри чора деб атади, аммо Россиянинг хорижий ишчи кучига бўлган эҳтиёжини эслатиб ўтди. Шу билан бирга, баъзи иш берувчилар пул тежаб қолиш учун ноқонуний муҳожирларни ёллашни афзал кўради, дейилади давлат Думасида.
Ички ишлар вазирлигининг ахборотига кўра, 2021 йил 31 май ҳолатига кўра, ишлаш учун амалдаги рухсатномалар сони 71,1 мингта (ўтган йили — 91 минг), патентлар — 1,1 миллионта (ўтган йили —1,5 миллион) бўлган.
«Қонунни бузган муҳожирларни мамлакатдан чиқариб юбориш мантиқий ва тўғри чора ҳисобланади», — деди Миллатлараро ва динлараро муносабатларни уйғунлаштириш бўйича жамоат палатаси комиссиясининг раиси, Россия халқлари ассамблеяси кенгаши раисининг биринчи ўринбосари Владимир Зорин.
Унинг сўзларига кўра, Россия ўзининг саноат салоҳияти ва иқтисодий кўрсаткичларини оширишга интилаётгани туфайли унга хорижий ишчи кучи зарур.
«Бу ерда демография омили муҳим аҳамиятга эга. Мамлакатимизнинг кўп қисмида нафақат аҳолининг табиий пасайиши, балки миграция ҳам кузатилмоқда, одамлар ҳудудларни тарк этмоқда. Биз иқтисодиётимиз учун зарур ва маълум малакаларга эга одамларнинг мамлакатимизга келиши учун шароит яратиб беришимиз керак. Энг муҳими, улар бизнинг қонунларимизни ва маданиятлараро мулоқотимизнинг қабул қилинган меъёрларини бузмаслиги керак», — дейди Владимир Зорин.
У Россия Федерацияси учун зарур мигрантларни танлаш тизимини яратиш лозимлигини айтди. Давлат Думасининг таъкидлашича, чет эл фуқароларини Россия маданий майдонига бирламчи интеграция қилиш вазифаси мавжуд. Шунга қарамай, россиялик тадбиркорлар баъзида қонун бўйича ишлашни хоҳламайди, чунки улар учун ноқонуний муҳожирларни ёллаш камхаржроқ.
«Йирик бизнеслар чет элдан келувчи ақлли кадрларни истамайди. Бу кўпроқ қора бозорга хос. Биз тил биладиган, тиббий текширувдан ўтган одамларни ёллаш жараёнини тартибга солишга ҳаракат қилдик. Бироқ ҳозирги кунга қадар бундай ёллаш тартиби ишламаяпти. Аммо улар гастарбайтерларни фаол жалб қилмоқда, уларга иш ҳақи конвертда ва россияликларга нисбатан анча кам қийматда тўланади. Бу ерда етарли ишга эга бўлмаган россияликлар ҳам, ноқонуний муҳожирлар ҳам азият чекмоқда», — деди давлат Думасининг МДҲ ишлари, Евросиё интеграцияси ва ватандошлар билан алоқалар қўмитаси раиси Леонид Калашников. Унинг сўзларига кўра, россияликларни ишга боришга рағбатлантириш учун ишчи касбларнинг обрўсини ошириш керак.
«Баъзи Европа мамлакатларида бу йўл аллақачон муваффақиятли босиб ўтилган ва маҳаллий аҳоли ўз хоҳиши билан, дейлик йўл қурилишида иштирок этмоқда. Худди шундай фаррошларга ҳам хизмат уйини бериш ва муносиб иш ҳақи таклиф қилиш мумкин» — дея қўшимча қилди у.
Аввалроқ Россия қурилиш майдонларига 2024 йилга қадар 5 миллион меҳнат муҳожирини жалб этиш зарурлиги маълум қилинганди.
Изоҳ (0)