Индонезияда бортида 56 нафар одам бўлган кема чўкиб кетди (видео)

Индонезияда 50 нафардан зиёд одамни олиб кетаётган кема чўкиб кетди. Бу ҳақда Detik портали хабар тарқатди.

Ҳодиса Бали қўлтиғи яқинида содир бўлган. Кема бортида 41 нафар йўловчи ва 15 нафар экипаж аъзоси бўлган. Ҳалокат жойига қутқарув кемалари етиб борган ва улар камида 23 нафар одамни соҳилга элтиб қўйган. Кема бортида бўлган саккиз нафар одамнинг турли даражада жароҳат олгани ҳам маълум қилинган.

Қайд этилишича, Ява оролидан Бали томон кетаётган кема ҳалокатга учраши оқибатида олти нафар одам ҳалок бўлган.

Эслатиб ўтамиз, 14 июнда Яман соҳилларида ичида муҳожирлар бўлган кема чўкиб кетиб, унинг вайроналари атрофидан 150 га яқин одамнинг жасадлари топилганди. Бортида 250 га яқин одам бўлган кема балиқ овловчи қайиқ билан тўқнашган ва «оёғи осмондан бўлиб қолганди». 2 июнда Тунис соҳилларида муҳожирлар кемаси чўккан. Ўрта Ер денгизи орқали Италияга йўл олган кеманинг ҳалокатга учраши оқибатида камида 23 нафар муҳожир ҳалок бўлган, 70 нафар одам қутқариб қолинганди.

Шунингдек, май ойида Нигерияда кема ағдарилиши оқибатида 150 дан ортиқ одам ҳалок бўлган.