Indoneziyada bortida 56 nafar odam bo‘lgan kema cho‘kib ketdi (video)

Indoneziyada 50 nafardan ziyod odamni olib ketayotgan kema cho‘kib ketdi. Bu haqda Detik portali xabar tarqatdi.

Hodisa Bali qo‘ltig‘i yaqinida sodir bo‘lgan. Kema bortida 41 nafar yo‘lovchi va 15 nafar ekipaj a’zosi bo‘lgan. Halokat joyiga qutqaruv kemalari yetib borgan va ular kamida 23 nafar odamni sohilga eltib qo‘ygan. Kema bortida bo‘lgan sakkiz nafar odamning turli darajada jarohat olgani ham ma’lum qilingan.

Qayd etilishicha, Yava orolidan Bali tomon ketayotgan kema halokatga uchrashi oqibatida olti nafar odam halok bo‘lgan.

Eslatib o‘tamiz, 14-iyunda Yaman sohillarida ichida muhojirlar bo‘lgan kema cho‘kib ketib, uning vayronalari atrofidan 150 ga yaqin odamning jasadlari topilgandi. Bortida 250 ga yaqin odam bo‘lgan kema baliq ovlovchi qayiq bilan to‘qnashgan va “oyog‘i osmondan bo‘lib qolgandi”. 2-iyunda Tunis sohillarida muhojirlar kemasi cho‘kkan. O‘rta Yer dengizi orqali Italiyaga yo‘l olgan kemaning halokatga uchrashi oqibatida kamida 23 nafar muhojir halok bo‘lgan, 70 nafar odam qutqarib qolingandi.

Shuningdek, may oyida Nigeriyada kema ag‘darilishi oqibatida 150 dan ortiq odam halok bo‘lgan.