Канадада ҳаво ҳарорати Цельсий бўйича 45 даражадан ошиб кетди. Бу ҳақда Канада оммавий ахборот воситаларига асосланиб «Korrespondent.net» хабар берди.
Қайд этилишича, 28 июнь куни Британия Колумбияси провинциясидаги Литтон қишлоғида ҳарорат Цельсий бўйича 46,6 даражага етган. Шу тариқа мамлакатда 1937 йил 5 июлда ўрнатилган иссиқ ҳаво рекорди янгиланди, ўшанда 45 даража қайд этилганди.
Британия Колумбияси ва Альберта провинциялари, Саскачеваннинг катта ҳудудлари, шунингдек, Шимоли-ғарбий ҳудудлар ва Юкон аҳолиси ҳаво ҳарорати кўтарилиши ҳақида огоҳлантирилди. Ушбу провинцияларнинг айрим ҳудудларида ҳарорат Цельсий бўйича 40 даражага етади. Прогнозларга кўра, юқори намлик туфайли ҳарорат 50 даражадек туюлиши мумкин.
Аввалроқ АҚШнинг Калифорния штатида аномал иссиқ об-ҳаво туфайли фавқулодда ҳолат эълон қилинганди. Штатнинг айрим ҳудудларида ҳаво ҳарорати Цельсий бўйича деярли 48 даражага кўтарилган.
Шунингдек, Москва ва Петербургдаги илиқ ҳаво 100 йиллик рекордни янгилагани ҳақида хабар берилганди.
Изоҳ (0)