Америкалик олимлар уни таққан одамда коронавирус инфекцияси бор-йўқлигини аниқлашга имкон берувчи ҳимоя ниқобини ишлаб чиқди. Бу ҳақда Массачусетс технология институти (МIТ) сайтига таяниб, «РБК» хабар берди.
Ниқобларга жойлаштирилган бир марталик датчиклар 90 дақиқада инсон танасида инфекция мавжудлигини аниқлашга имкон беради. Бундай датчикларни бошқа турдаги ниқоблар ва лаборатория халатларига ҳам қадаш мумкин, шунингдек, улар бошқа вирусларни аниқлаш учун мослаштирилиши мумкин. Илгари улардан эбола ва зика вирусларини аниқлашда фойдаланилган.
Ниқобни таққан инсон нафасидаги вирус зарраларини аниқлайдиган датчиклар ниқобнинг ички қисмига жойлаштирилган бўлади. Хабарда айтилишича, махфийлик нуқтаи назаридан ҳам натижалар фақат ниқобнинг ички қисмида кўринади.
Гарвард университетининг Висса биологик муҳандислик институти тадқиқотчиси Питер Нгуен ниқобдаги датчикларнинг ПЗР-тестлари каби COVID-19’га ўта сезгирлигини таъкидлади.
«Бу тез тиббий ёрдам ходимлари, тиббиёт ходимлари ва ҳарбий хизматчиларга янги авлод биосенсорларидан фойдаланиш имконини яратиши мумкинлигига ишонамиз», — деди МIТ профессори Жеймс Коллинз.
Ниқобни яратишда Массачусетс технология институти мутахассислари Гарвард университетидаги ҳамкасблари билан ҳамкорлик қилган.
Аввалроқ АҚШдаги Жорж Вашингтон университетида мобил телефонлар ёрдамида коронавирусни аниқловчи кичик қурилма, Эронда коронавирусни ярим дақиқада аниқловчи нанотест яратилгани ҳақида хабар берилган эди.
Шунингдек, Буюк Британияда COVID-19’ни бир неча сонияда аниқлайдиган тест ишлаб чиқилган, Германияда эса вирусни аниқловчи дунёдаги энг тезкор тест тизими яратилганди.
Изоҳ (0)