Жонс Ҳопкинс университети маълумотларига кўра, дунёда коронавирусни юқтириб олганлар сони 181 488 102 кишига етган, шуларнинг 3 931 204 нафари вафот этган. Касалланиш ҳолатларининг кўплиги бўйича АҚШ (33,6 миллион), Ҳиндистон (30,3 миллион), Бразилия (18,4 миллион), Франция (5,8 миллион) етакчилик қилмоқда. Шунингдек, Россия 5,4 миллион киши билан Туркияни ортда қолдириб, юқори бешликка чиқди.
Хитойнинг SinoVac вакцинаси болаларда синовдан ўтказилди
Хитойнинг Sinovac Biotech Ltd биофармацевтика компанияси томонидан ишлаб чиқарилган CoronaVac вакцинаси 3 ёшдан 17 ёшгача бўлган болалар гуруҳида синовдан ўтказилди. 2020 йил 31 октябрдан 2 декабргача давом этган клиник синовларнинг биринчи босқичида 72 нафар бола иштирок этди. Ўша йилнинг 12 декабридан 30 декабрига қадар ўтказилган иккинчи босқичда 480 иштирокчи қатнашди.
Клиник синовларнинг биринчи босқичидан сўнг, эмланган болаларнинг 100 фоизида антитаналар пайдо бўлди. Иккинчи босқичдан сўнг 1,5 микрограммдан доза олган болаларда 96,8 фоиз ҳолларда, 3 микрограммдан доза олган болаларда 100 фоиз ҳолларда антитана аниқланди. Плацебо олган болаларда эса антитана аниқланмади.
Маълумотларга кўра, вакцинанинг 1,5 микрограмм дозасини олган болаларнинг 26 фоизида, 3 микрограмм дозасини олганларнинг 29 фоизида эмлашдан кейин 28 кун ичида салбий реакциялар юзага келган. Ушбу реакцияларнинг аксарияти инъекция жойидаги оғриқ билан боғлиқ.
Синовлар натижаларига мувофиқ олимлар CoronaVac вакцинасини хавфсиз ҳамда болалар ва ўсмирларда жавоб иммунитети ҳосил қилади деган хулосага келди.
Россияда COVID-вакцина туфайли ҳеч ким вафот этмаганРоссияда бугунга қадар COVID-19’га қарши эмлаш билан тўғридан-тўғри боғлиқ бирорта ўлим қайд этилмаган. Россия соғлиқни сақлаш вазири Михаил Мурашконинг таъкидлашича айни пайтда давлат хизматлари порталида эмланган фуқароларнинг 30 фоизига тегишли эмлашдан кейинги ўз-ўзини кузатиш кундаликлари сақланади, барча узатиладиган маълумотлар Соғлиқни сақлаш вазирлиги томонидан умумлаштирилади.
«Асоратларнинг аксарияти инъекция жойидаги оғриқ, ҳароратнинг қисқа муддатли кўтарилиши, камдан кам учрайдиган ва ифодаланмайдиган майда симптомлардир», — деди Мурашко.
Вазир мамлакатда 23 миллион киши коронавирусга қарши эмланганини қўшимча қилди.
Грузияда коронавируснинг дельта штамми тарқалмоқдаЯқин келажакда Грузияда коронавирус инфекциясини юқтириш ва касалликдан ўлим ҳолатлари кўпайиши мумкин. Эпидемиологик вазиятнинг бундай ривожланишига мамлакатда қайд этилган коронавируснинг дельта («ҳиндча») штамми сабаб бўлиши мумкин. Сўнгги 24 соат ичида 7 кишида мазкур штамм аниқланган.
Грузияда ҳозирги кунда коронавирусга чалиниш ҳолатларининг 10 фоиздан 20 фоизгача бўлган қисми дельта штаммга тўғри келмоқда. Соғлиқни сақлаш вазирлигининг маълумотларига кўра, сўнгги 24 соат ичида Грузияда 1194 кишида COVID-19 қайд этилди, 22 нафар бемор вафот этди.
Шунингдек:- Ҳиндистонда коронавирусга қарши қўлланилган вакциналарнинг умумий миқдори АҚШда қўлланилган миқдордан ошиб кетди. 28 июнь ҳолатига кўра, мамлакатда 32,36 миллион доза вакцина ишлатилган. АҚШда эса бу кўрсаткич 32,33 миллион дозани ташкил қилади.
- Грецияда ёшларга COVID-19’га қарши эмланиш эвазига 150 евро ваъда қилинди. Акцияда 26 ёшгача бўлган фуқаролар иштирок этиши мумкин. Вакцинанинг биринчи дозасини олган фуқаронинг электрон ҳамёнига 150 евро миқдорида пул ташлаб берилади. Ушбу электрон ҳамён лойиҳаси асосан кўнгилочар ва сайёҳлик соҳаларига қаратилган. Пуллардан самолёт, паром ёки поезд чипталари, машина ижараси, лагерда жой банд қилиш, музей, театр, кинотеатр ёки археологик майдонга чипта сотиб олиш учун фойдаланиш мумкин бўлади.
- Австралия ҳукумати бир неча тоифадаги аҳоли учун мажбурий вакцинацияни жорий қилмоқда. Кексалар, ногиронлар, қариялар уйлари ходимлари, шунингдек кексалар ва ногиронлар учун мактаб-интернатлари ходимлари эмланиши шарт бўлади. Ушбу тоифадаги кишиларнинг барчаси 2021 йил сентябрь ойининг ўрталарига қадар ҳеч бўлмаганда вакцинанинг биринчи дозасини олиши керак. Қариялар уйлари ва интернатлардаги ходимлар вакцинациясини ташкил этиш учун ҳукумат 11 миллион Австралия доллари (8,3 миллион доллар) ажратади. Ушбу маблағ кўчма эмлаш марказларини ташкил қилишга йўналтирилади. Ходимларга эмлангандан сўнг бир кунлик дам ёки 185 Австралия доллари (140 доллар) миқдорида бир марталик тўлов берилади.
Изоҳ (0)