Афғонистонда «Толибон» ҳаракатининг Балх вилояти Калдор уезди Укчук чегара пунктига уюштирган ҳужуми натижасида ҳукумат қўшинларининг 17 нафар ҳарбий хизматчиси Тожикистон ҳудудига чекинди. Бу ҳақда Тожикистон Миллий хавфсизлик давлат қўмитаси чегара қўшинлари матбуот марказига таяниб, «РИА Новости» хабар берди.
Фото: AP Photo
«Маҳаллий вақт билан соат 12:50 гача (27 июнь) давом этган шиддатли тўқнашув натижасида ҳукумат қўшинларининг 17 нафар ҳарбий хизматчиси ўз ҳаёти ва шахсий таркибни сақлаб қолиш учун «Шаҳритус» чегара отрядининг 1-пости орқали Тожикистон ҳудудига чекинишга мажбур бўлди» — дейилади матбуот маркази ходими берган хабарда.
Унинг сўзларига кўра, тожик чегарачилари инсонпарварлик ва яхши қўшничилик тамойилларини инобатга олган ҳолда, давлат чегарасини бузган афғон ҳарбийлари учун Тожикистон ҳудудига эркин киришга рухсат берган.
«Ушбу чегара ҳудудида вазият кескинлигича қолмоқда, ‘Толибон’ ва Афғонистон ҳукумат кучлари ўртасида жанглар давом этмоқда», — дея қўшимча қилди матбуот маркази ходими.
Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик-афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди. АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.
Эслатиб ўтамиз, Америка ва НАТО мамлакатлари қўшинлари 29 апрелдан Афғонистондан чиқиб кетишни бошлади. Июнь ойи бошида АҚШ Афғонистондан ўз қўшинларининг учдан бир қисмини олиб чиқиб кетгани хабар берилганди. Шунингдек, Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллаши ҳақида АҚШ ва Туркия президентлари Жо Байден ва Ражаб Тоййиб Эрдўғон келишиб олган эди.
Associated Press хабарига кўра, АҚШ қўшинларининг асосий қисмини олиб чиққанидан кейин Афғонистонда 650 га яқин америкалик ҳарбийни қолдирмоқчи. Таъкидланишича, Афғонистонда қоладиган ҳарбийлар дипломатларнинг хавфсизлигини таъминлайди.
