Буюк Британия соғлиқни сақлаш вазири Мэтт Хенкок маъшуқаси билан сурати ОАВ орқали эълон қилингач, истеъфо учун ариза берди, деб ёзади «РБК».
25 июнь куни Британиянинг Sun таблоиди эълон қилган суратда Хенкок Оксфорд университетидаги ўқиши чоғида танишган дўсти Жина Коладанжелодан бўса олаётгани акс этган. Сурат Соғлиқни сақлаш вазирлиги биносида олинган.
Хенкокнинг ҳам, Коладанжелонинг ҳам оиласи ва болалари бор. Аммо Британия жамоатчилигини никоҳдан ташқари муносабатлар эмас, вазирнинг коронавирусга қарши чекловлар кучайган бир пайтда ижтимоий масофага риоя қилмагани ҳолати норози қилди. Шунингдек, Хенкок Коладанжелони дастлаб шахсий ёрдамчи, сўнг вазирлик кенгашига аъзо қилиб ишга олгани ҳам вазиятни янада можароли қилди.
Хенкокнинг ўзи бош вазир Борис Жонсонга йўналтирилган истеъфо ҳақидаги аризасида унинг шахсий ҳаёти мамлакатнинг асосий вазифаси — пандемия оқибатида юзага келган инқироздан чиқишидан чалғитишини истамаганини билдирди.
«Қоидаларни бузганим учун кечирим сўрайман, оилам ва яқинларимдан уларни бу синовга рўбарў қилганим учун узр сўрайман. Бундан ташқари, бундай вақтда мен ўз болаларим билан бўлишим керак», — деб ёзди соғлиқни сақлаш вазири.
Кейинроқ Британия бош вазирининг матбуот хизмати Хенкокнинг ўрнига собиқ молия ҳамда ички ишлар вазири Сажид Жавид тайинланишини маълум қилди.
Эслатиб ўтамиз, аввалроқ Бразилия президенти Жаир Болсонаруга Сан-Паулу штатида бўлиб ўтган мотопойгада ниқоб тақмагани учун жарима солинган эди.
Изоҳ (0)