Ryanair самолёти фавқулодда қўнганидан кейин Беларусда ҳибсга олинган Nexta Telegram каналининг собиқ бош муҳаррири Роман Протасевич ва унинг севгилиси Софья Сапега тергов изоляторидан уй қамоғига ўтказилди. Бу ҳақда ҳибсга олинганларнинг ота-оналари «Россия BBC хизмати»га хабар берди.
Уларнинг сўзларига кўра, ҳозирда Протасевич ва Сапега Минскда ижарага олинган алоҳида-алоҳида квартирада яшамоқда. Сапеганинг адвокатлари ва Россия элчихонаси унга нисбатан эҳтиёт чоралари ўзгартирилгани ҳақидаги маълумотни тасдиқлади. Ҳибсга олинганларни уй қамоғига ўтказиш уларнинг яқинлари учун кутилмаган янгилик бўлди.
«Буни эшитиб шокка тушдик», — деди Софьянинг ўгай отаси Сергей Дудич.
«Расмийларнинг хатти-ҳаракатлари, уларнинг мақсадлари ҳақида бир нима дейишим қийин», — деди Романнинг отаси Дмитрий Протасевич агентликка. «Балки у қандайдир сиёсий ўйинга аралашиб қолган бўлиши мумкин».
Унинг таъкидлашича, Беларусь расмийлари ҳибсга олинганларга қарши айбловларни бекор қилмаган. «Эҳтиёт чораси ўзгартирилиши билан уларнинг яшаш шароитлари яхшиланган, холос. Қолганларига келсак, бундан кейин нима бўлиши номаълум», — дея қўшимча қилди Дмитрий Протасевич.
23 июнь куни Беларуснинг мухолифатчи блогери Антон Мотолко ўзининг телеграм каналида фотосуратлар чоп қилган. Суратларда Протасевич ва Сапега гўёки Минскдаги паркда эркин айланиб юриб, баъзи журналистларга камера қаршисида интервью бергани акс этган.
Софья Сапеганинг адвокати Антон Гашинский мижозининг тергов изоляторидан уй қамоғига ўтказилишини Россия ва Беларусь президентларининг учрашуви билан боғлади. «Шу туфайли Софьянинг келажакдаги тақдири аниқ ва ижобий бўлади. Ўйлайманки, у уйига қайтади», — деди адвокат.
Беларусь ҳукумати Роман Протасевичга мамлакат Жиноят кодексининг учта моддаси бўйича: 130 (ижтимоий адоват ва келишмовчиликни қўзғатиш), 293 (оммавий тартибсизликларни уюштириш) ва 342 (жамоат тартибини қўпол равишда бузадиган ҳаракатларни уюштириш) билан айбламоқда.
Россиялик Софья Сапега эса Беларусь Жиноят кодексининг икки моддаси бўйича гумон қилинмоқда: 130 (ижтимоий нафрат ва нифоқни қўзғаш) ва 342 (оммавий тартибсизликларда қатнашиш).
3 июнь куни Беларуснинг «ОНТ» давлат телеканали Роман Протасевич билан ўтказилган узоқ интервьюни намойиш қилди, унда Протасевич Беларусь мухолифатини танқид қилди ва Александр Лукашенкони ҳурмат қилишини билдирди. 14 июнь куни Беларусь Ташқи ишлар вазирлигида Протасевич иштирокида брифинг бўлиб ўтди, бирфингда у тергов органлари билан ихтиёрий равишда ҳамкорлик қилганини айтди.
Протасевичнинг онаси ўғлининг брифингдаги иштирокини унга таҳдид қилинаётгани билан изоҳлади. Журналистнинг ота-онаси таъкидлашича, ўғли қийноққа солинган.
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида Роман Протасевич ҳам бор эди. Протасевич ва унинг севгилиси — Россия фуқароси Софья Сапега аэропортда қўлга олинган.
Изоҳ (0)