Porsche спорткари йўл машиналари ўртасида рекорд ўрнатди. Нюрбургрингнинг энг яхши кўрсаткичи энди 911 GT2 RS’га тегишли

Porsche компанияси йўл автомобиллари ўртасида Нюрбургринг трассасини босиб ўтиш бўйича янги рекорд ўрнатганини эълон қилди: у тюнинг қилинган 911 GT2 RS моделига тегишли бўлиб, у 20,8 километрли «Шимолий сиртмоқ»ни 6 дақиқа-ю 43,3 сонияда босиб ўтган. Синовчи-пойгачи Ларс Керн 700 от кучига эга спорткарда серияли машиналар ўрасида ўрнатилган аввалги рекордни 4,747 сонияга яхшилашга муваффақ бўлган, деб хабар беради Motor.

Бундан олдинги рекорд 730 от кучига эга Mercedes-АМG GТ Black Series томонидан ярим йил олдин ўрнатилган эди: Manthey-Racing жамоаси томонидан модификация қилинган 911 GT2 RS ундан 4,7 сонияга тезроқ бўлиб чиқди. Porsche спорткарининг олд бамперларига қўшимча «шиткалар», ост қисмига карбон панеллар, янги диффузор ва антиқанот ўрнатилиши натижасида соатига 200 километр тезликда босим кучи олд ўқда 49 дан 70 килограммга, орқа ўқда эса 93 дан 200 килограммга ошган.

Олд ўққа диаметри 20 дюймли, орқасига 21 дюйм магнийли ғилдирак дискалари ўрнатилган — улар сериялида 11,4 килограммга енгилроқ. Бундан ташқари, 911 GT2 RS керамик композит тормозлар учун махсус пойга колодкаларига эга бўлган, у қизиб кетишга анча бардошли. Бошқа қўшимча жиҳатлари қаторидан совитувчи интеркулернинг пуркагич тизими учун қўшимча сув баки ва ҳалқасимон трассада ҳаракатланиш учун винтли «подвеска» ўрин олган.

Рекорд кўрсаткич 14 июнь куни нотариус иштирокида қайд этилган, шундай экан натижа расмий ҳисобланади. Porsche маълумотларига кўра, 911 GT2 RS’нинг ўртача тезлиги соатига 185,87 километрни ташкил этган, шароит эса мураккаб: асфальт Цельсий бўйича 41 даражага қизиган.

Аввалроқ янги Porsche Cayenne Coupe кроссовери «SUV, off-road, vehicle, van, pock-up» йўналишлари бўйича Нюрбургринг рекордини ўрнатган эди.