Porsche Taycan uzluksiz driftda 42 km yo‘l bosib Ginnesning rekordlar kitobidan joy oldi

Porsche kompaniyasi elektromobilda eng uzoq driftni amalga oshirib jahon rekordini o‘rnatdi. Xokkenxaymringdagi Porsche Experience o‘quv-mashg‘ulot markazida marka instruktori Dennis Retera orqa uzatmali Taycan elektrokarida uzluksiz driftda 210 aylanani amalga oshirgan, deb xabar beradi Motor.

Drift maxsus tayyorlangan poyga trassasida bo‘lib o‘tgan. 80 metrli dinamometrik maydonga suv sepilgan, marshrut bo‘ylab va burilishlarga GPS, shuningdek, mashina tomining markaziy qismiga kamera o‘rnatilgan. Natijalarni tasdiqlash uchun nemis o‘quv-mashg‘ulot markaziga Ginnesning rekordlar kitobi rasmiy vakillari, shuningdek, drift bo‘yicha ikki karra Yevropa chempioni Denis Rismann ham tashrif buyurgan.

Drift uchun nemis mutaxassislari orqa o‘qli bitta elektromotorga ega old seriyali Porsche Taycan’dan foydalangan. Kompaniya elektrokarning texnik tavsifiga oid ma’lumotlar bilan bo‘lishmagan. Bazaviy jamlanmadagi modelga 408 ot kuchiga ega elektromotor va sig‘imi 79,2 kilovatt/soatli akkumulyator batareyalari o‘rnatiladi.

Elektrokarni tajribali driftchi Dennis Reter boshqargan. Poygachi uzluksiz boshqaruvda 210 ta aylanani amalga oshirgan. Sportchi 55 daqiqada jami 42 171 metrni bosib o‘tgan. Porsche Taycan’ning o‘rtacha tezligi soatiga 46 kilometrni tashkil etgan. Haydovchining so‘zlariga ko‘ra, harakat avvalida u ataylab barqarorlashtiruvchi barcha tizimlarni o‘chirib qo‘ygan va “podveska” hamda rul boshqaruvini o‘ziga moslashtirib olgan. Natijada sportchi butun harakat davomida elektromobilni to‘liq boshqara olgan.