Papadakis Racing пойга жамоаси Toyota Supra автомобили трамплиндан экстремал сакрашни амалга оширгани тасвирланган олти дақиқали видеони эълон қилди. Мутахассислар «ёстиқ» сифатида улкан картон қутиларидан фойдаланган, деб хабар беради Motor.
The Pitch реклама ролигининг сюжети бўйича, Gazoo Racing бўлинмасининг пойга спорти мутахассислари буюртмачи билан янги Toyota Supra’нинг имкониятларини намойиш этишнинг турли вариантларини муҳокама қилади. Мутахассислар спорткарнинг дрифтдаги имкониятини алоҳида таъкидлайди, бироқ уларнинг фикрича, бу замонавий харидорларни ҳайратда қолдириш учун етарли эмас. Шунда экстремаллар купе ёрдамида трамплиндан сакрашга қарор қилади.
Трюкни бажариш учун муҳандислар махсус рампа қурган ва Toyota унинг ёрдамида тахминан 30 метр ҳавода парвоз қилган. Суратга олиш жараёнида спорткарнинг 340 от кучига эга стандарт модификацияси қатнашган. Ўзгаришга учраган ягона қисми — қўшимча каркас ва ҳайдовчи учун кўп нуқтали хавфсизлик камари. Бундан ташқари, Supra’ни парвоз давомида барқарорлаштириш учун спорткар юкхонасига баласт қўйилган. Бу унинг тумшуқ қисми билан «ерга санчилмаслигини» таъминлаган.
Зарбани юмшатиш учун экстремаллар картон қутиларини горизонтал ҳолатда териб чиққан. Ерга қўниш вақтида спорткарнинг орқа «подвеска»сига жиддий шикаст етган ва у синов майдонини эвакуатор ёрдамида тарк этган. Шунга қарамай, картон «ёстиқ» купеда ўта жиддий оқибатлар юзага келишини бартараф этган.
Изоҳ (0)