Сиднейда Subaru BRZ ҳайдовчиси 11 дақиқа ичида қарийб 8 минг долларлик жаримага тортилди. Бундай қоидабузарлик учун қамоқ жазоси берилиши мумкин

Австралиянинг Сидней шаҳрида истиқомат қилувчи 23 ёшли фуқаро тунда ўзининг Subaru BRZ автомобилида сайрга чиқишга қарор қилган. У 11 дақиқалик ҳаракат давомида 7750 АҚШ доллари миқдорида жаримага тортилишини хаёлига ҳам келтирмаган. Эндиликда эркак тўққиз ойгача озодликдан маҳрум этилиши, транспорт воситаси эса мусодара қилиниши мумкин, деб хабар беради Motor.

Тунги Сидней кўчалари ва Subaru BRZ спорт автомобили — Австралия фуқароси буни идеал кеча сифатида тасаввур қилган. Бироқ эркак трассага чиқиши билан унинг спорткари узра автомобиль тезлигини тепловизион камера ёрдамида кузатувчи полиция вертолёти пайдо бўлган. Ҳайдовчи белгиланган тезлик меъёрини оширганини кўрган полициячилар ердаги патрулга қоидабузар ҳақида маълумот берган.

Йўл патрули Subaru’ни дарҳол тўхтатган, офицерлар ҳайдовчининг ҳужжатларини текшириб, эркакка нисбатан бирор айблов билдирмасдан қўйиб юборган. Аммо тепловизор қайдлари ва бошқа кузатув камераларидаги ёзувлар қайта ўрганиб чиқилгач, полициячилар эркак камида беш маротаба соатига 20 километрдан ортиқ тезликни оширганини аниқлаган. Энг катта оширилган тезлик — белгиланган меъёрдан 50 километр/соатга кўп.

Полиция тезликни тизимли равишда оширган ҳайдовчига хавфли бошқарув бўйича айблов эълон қилган. Австралия қонунларига кўра, бу каби қоидабузарлик учун тўққиз ойгача озодликдан маҳрум этилиш, шунингдек, бир йилга ҳайдовчилик гувоҳномасидан айрилиш ва автомобиль мусодара қилиниши мумкин.

Эслатиб ўтамиз, 2020 йилнинг июлида Италияда Ford Focus ҳайдовчисига машинани соатига 703 километр тезликда ҳайдагани учун жарима келганди.