Porsche kompaniyasi yo‘l avtomobillari o‘rtasida Nyurburgring trassasini bosib o‘tish bo‘yicha yangi rekord o‘rnatganini e’lon qildi: u tyuning qilingan 911 GT2 RS modeliga tegishli bo‘lib, u 20,8 kilometrli “Shimoliy sirtmoq”ni 6 daqiqa-yu 43,3 soniyada bosib o‘tgan. Sinovchi-poygachi Lars Kern 700 ot kuchiga ega sportkarda seriyali mashinalar o‘rasida o‘rnatilgan avvalgi rekordni 4,747 soniyaga yaxshilashga muvaffaq bo‘lgan, deb xabar beradi Motor.
Bundan oldingi rekord 730 ot kuchiga ega Mercedes-AMG GT Black Series tomonidan yarim yil oldin o‘rnatilgan edi: Manthey-Racing jamoasi tomonidan modifikatsiya qilingan 911 GT2 RS undan 4,7 soniyaga tezroq bo‘lib chiqdi. Porsche sportkarining old bamperlariga qo‘shimcha “shitkalar”, ost qismiga karbon panellar, yangi diffuzor va antiqanot o‘rnatilishi natijasida soatiga 200 kilometr tezlikda bosim kuchi old o‘qda 49 dan 70 kilogrammga, orqa o‘qda esa 93 dan 200 kilogrammga oshgan.
Old o‘qqa diametri 20 dyuymli, orqasiga 21 dyuym magniyli g‘ildirak diskalari o‘rnatilgan — ular seriyalida 11,4 kilogrammga yengilroq. Bundan tashqari, 911 GT2 RS keramik kompozit tormozlar uchun maxsus poyga kolodkalariga ega bo‘lgan, u qizib ketishga ancha bardoshli. Boshqa qo‘shimcha jihatlari qatoridan sovituvchi interkulerning purkagich tizimi uchun qo‘shimcha suv baki va halqasimon trassada harakatlanish uchun vintli “podveska” o‘rin olgan.
Rekord ko‘rsatkich 14-iyun kuni notarius ishtirokida qayd etilgan, shunday ekan natija rasmiy hisoblanadi. Porsche ma’lumotlariga ko‘ra, 911 GT2 RS’ning o‘rtacha tezligi soatiga 185,87 kilometrni tashkil etgan, sharoit esa murakkab: asfalt Selsiy bo‘yicha 41 darajaga qizigan.
Avvalroq yangi Porsche Cayenne Coupe krossoveri “SUV, off-road, vehicle, van, pock-up” yo‘nalishlari bo‘yicha Nyurburgring rekordini o‘rnatgan edi.
Izoh (0)