Афғонистондан АҚШ қўшинларини олиб кетиш жараёни тугаганидан сўнг олти ой ўтиб Афғонистон ҳукумати қулаши мумкин. АҚШ разведкаси шундай фикрда, деб ёзади The Wall Street Journal АҚШ ҳукуматидаги манбаларига асосланиб.
Газета қайд этишича, аввалроқ Америка разведкаси Афғонистон президенти Ашраф Ғани ҳукумати АҚШ қўшинларининг кўмагисиз камида икки йилга бардош бера олади деган фикрда эди. Бироқ сўнгги пайтларда кескинликнинг кучайиши, ҳукумат кучлари ва «Толибон» ҳаракати аъзолари ўртасидаги тўқнашувлар фонида АҚШ разведкаси ўз прогнозини ўзгартирди.
Энди Кобулдаги ҳукумат Америка ҳарбий контингенти чиқарилгандан кейин олти ойдан бир йилгача бўлган даврда қулаши мумкин деб тахмин қилинмоқда. Бундан ташқари, бир қатор Ғарб расмийлари Афғонистон ҳукумати уч ойдан кўпроқ вақт ҳокимиятни ушлаб туролмайди, деган фикрда. Шу билан бирга, газета таъкидлашича, «Толибон» фаоллигининг кучайиши фонида Америка маъмурияти ҳарбийларга қўшинларни олиб чиқишни секинлаштиришни, шунингдек, Кобул яқинидаги Баграм аэродроми ишини вақтинча сақлаб қолишни тавсия қилмоқда.
Июнь ойи ўрталарида АҚШ мудофаа вазири Ллойд Остин Америка қўшинлари чиқарилгандан кейин халқаро террористик ташкилотлар Афғонистондаги фаолиятини тиклаши ва икки йилдан сўнг яна АҚШга таҳдид сола бошлаши мумкинлигини айтганди. АҚШ қуролли кучлари штаб қўмитаси раиси, генерал Марк Милли унинг фикрига қўшилиб, агар Афғонистон ҳукумати ҳокимиятдан четлатилса ёки афғон хавфсизлик кучлари тарқатиб юборилса, у ҳолда хавф ошиши муқаррарлигини айтган.
Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли кучларни 11 сентябргача тўлиқ чиқариб кетиш режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлади. Айни вақтда АҚШ давлат котиби Энтони Блинкен Афғонистондан қўшинлар чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмади.
Изоҳ (0)