Жанубий Африка Республикаси (ЖАР)да бирйўла 10 бола туғилгани ҳақидаги хабар муаллифи Пит Рампеди тасдиқланмаган ҳикояни нашр этгани учун ўз таҳририятидан узр сўради, деб ёзади «РИА Новости».
8 июнь куни ЖАРнинг Гаутенг провинциясида 37 ёшли Гозиам Ситхол бирйўла ўн чақалоқни дунёга келтириб, дунё рекордини янгилагани ҳақида хабар берилганди.
Бироқ Жанубий Африка Соғлиқни сақлаш вазирлиги ушбу маълумотни тасдиқламади. Гозиам Ситхолнинг турмуш ўртоғи ҳам болаларни кўрмаганини айтди.
Мақола муаллифи манбаларга ишониб, ушбу болалар туғилиши масаласини чуқур ўрганмаганини ва суриштирув ўтказмаганини тан олди, аммо у аёлнинг ҳомиладор бўлгани ва фарзанд кўрганига ишончи комиллигини айтди.
«Сизга 2021 йил 8 июнда чоп этилган 10 чақалоқ ҳикояси қандай қабул қилингани ва унинг компания обрўсига муқаррар таъсири ҳақида афсус ва пушаймонлик билан ёзмоқдаман. Шуни айтишим керакки, мен бошиданоқ Гозиам Ситхолнинг ҳомиладорлиги ва ҳақиқатан шунча фарзанд дунёга келтиргани ҳақидаги фактни қаттиқ туриб маъқуллаб келмоқдаман. Бу мақола билан жамоа, компания ва ҳамкасбларимнинг обрўсига путур етказганимдан афсусдаман. Бунинг учун сиздан ва ҳамкасбларимдан узр сўрайман», — деб ёзган Рампеди таҳририят бош муҳарририга.
Аввалроқ Гозиам Ситхолнинг эри полицияга мурожаат қилиб, Ситхол ғойиб бўлганини ва 8 июнь куни — у ўнта бола дунёга келтирганини эълон қилганидан кейин дарҳол алоқаларни узганини айтган. Полиция аёлни топиб, ваколатли хизматларга топширган. Айни пайтда аёл руҳий касалликлар шифохонасига ётқизилган.
Мавзуга доир: Африка давлатида аёл бирйўла 9 фарзандни дунёга келтирди
Изоҳ (0)