Бухоро вилоятининг Шофиркон туманида мактабни мукаммал таъмирлаш ишларида бажарилмаган ишларни «бажарилди», деб кўрсатиб, давлат бюджетидан 32 миллион сўмнинг талон-торож бўлишига сабабчи бўлган қурилиш ташкилоти масъули жавобгарликка тортилди. Бу ҳақда «Дарё»га Жиноят ишлари бўйича Шофиркон туман суди раиси Улуғбек Бозоров маълум қилди.
Маълум бўлишича, 2019 йил 18 март куни буюртмачи Бухоро вилоят ҳокимлиги ҳузуридаги ягона буюртмачи хизмати инжиниринг компанияси Шофиркон туманидаги «Элшод қурилиш сервис» МЧЖ раҳбари лавозимида ишлаб келаётган 30 ёшли Элшод Рустамов (ташкилот номи ва раҳбарининг исм-шарифи ўзгартирилган) билан шартнома имзолаган. Шартномага кўра, пудратчи тумандаги «Талисафед» МФЙ ҳудудида жойлашган 21-сонли умумий ўрта таълим мактаби биносини замон талабига мос равишда мукаммал таъмирлаш мажбуриятини олган. Шунга мувофиқ, инжиниринг компанияси томонидан мактабни мукаммал таъмирлаш ишларини амалга ошириш учун 2 миллиард 946 миллион 392 минг сўм миқдоридаги маблағ йўналтирилган.
2019 йилнинг 19 ноябрь куни пудратчи ишнинг тўлиқ якунлаганини маълум қилган. Қурилиш объектини қабул қилиб олиш жараёнида мактабнинг лойиҳадаги сингари мукаммал эмаслигига шубҳа туғилгач, назорат идораларидан иборат ишчи-гуруҳ тузилиб, қурилиш объектини назорат ўлчовидан ўтказишга киришилган.
Ўрганиш жараёнида ҳисоб-фактура маълумотномаларида кўрсатилган ишларнинг бажарилмагани ва ёш мансабдорнинг 32 миллион сўмлик қурилиш таъмирлаш ишлари бажарилмасада, бажарилган дея маълумот бергани ошкор бўлган.
«‘Элшод қурилиш сервис’ масъулияти чекланган жамияти томонидан 5 та ҳолатда бажарилмаган ишларга қўшиб ёзиш натижасида жами 32 миллион 213 минг сўмлик талон-торожликларни юзага келтиргани аниқланди», — дейди Улуғбек Бозоров.
Судланувчи иқтисодиёт соҳасидаги жиноятлар туркумига кирувчи ўз хатти-ҳаракатларига тўлиқ иқрор бўлиб, ўз қилмишидан чин кўнгилдан пушаймонлигини билдирган. Ва у ўзи томонидан етказилган моддий зарарни тўлиқ қоплаб берган.
Бундан ташқари, судланувчига нисбатан Жиноят кодексининг 167-моддаси 2-қисми «г» банди (мансаб мавқейини суиистеъмол қилиш йўли билан талон-торож қилиш) қўлланилиб, у базавий ҳисоблаш миқдорининг 80 баравари миқдорида, яъни 17 миллион 840 минг сўм жаримага тортилган.
Изоҳ (0)