Navoiy viloyati Karmana tumanida joylashgan “Samarqand” YPX postida Buxorodan kelib chiqishi noma’lum bo‘lgan yirik shoxli qoramol go‘shtini veterinariya-sanitariya qoidalari talablariga zid ravishda Toshkentga olib ketayotgan haydovchilar aniqlandi. Bu haqda IIV matbuot xizmati xabar berdi.
Xususan, 3-iyundan 4-iyunga o‘tar kechasi, taxminan, soat 23:20 larda Navoiy viloyati Karmana tumanida joylashgan “Samarqand” YPX maskanida Buxoro—Toshkent yo‘nalishi bo‘ylab harakatlanib kelayotgan Buxoro viloyati, Peshku tumanida yashovchi N.H. boshqaruvidagi Lacetti Navoiy viloyati IIB PPX va JTSB karantin tadbirlarini ta’minlash bo‘linmasi xodimlari tomonidan to‘xtatib tekshirilganda, avtomobil yukxonasida 105 kilogramm kelib chiqishi noma’lum bo‘lgan yirik shoxli qoramol go‘shtini veterinariya-sanitariya qoidalari talablariga zid ravishda Toshkent shahriga sotish maqsadida olib ketayotganligi aniqlangan.
4-iyundan 5-iyunga o‘tar kechasi soat 00:25 larda esa Buxoro—Toshkent yo‘nalishi bo‘ylab harakatlanib kelayotgan Buxoro viloyati, Peshku tumanida yashovchi O.A. boshqaruvidagi Isuzu yuk mashinasi Navoiy viloyatida to‘xtatib tekshirilganda, avtomobil yukxonasida kelib chiqishi noma’lum bo‘lgan 160 kilogramm yirik shoxli qoramol go‘shti, 200 dona yirik shoxli qoramolning kallalari hamda 12 ta qopda 1500 kilogramm bo‘lgan tovuq go‘shti, jami 3 tonnaga yaqin mahsulotlarni olib ketayotganligi aniqlangan.
Mahsulotlarning sifatiga aniqlik kiritish maqsadida viloyat Veterinariya va chorvachilikni rivojlantirish boshqarmasi hamda mas’ul xodimlar tomonidan tekshirilganda, fuqaro ushbu go‘sht mahsulotlarini veterinariya-sanitariya qoidalari talablariga zid ravishda Toshkent shahriga sotish maqsadida olib ketayotganligi ma’lum bo‘lgan.
Har ikki holat yuzasidan fuqarolarga nisbatan Ma’muriy javobgarlik to‘g‘risidagi kodeksning 109-moddasi (veterinariya, veterinariya-sanitariya qoidalari va normalarini buzish)ga asosan ma’muriy bayonnoma rasmiylashtirilib, tushuntirish ishlari olib borilgan.
Avvalroq Samarqandda iste’molga yaroqsiz bo‘lgan qariyb 200 kilogramm, Qashqadaryoda esa 600 kilogramm shunday go‘sht yo‘q qilingani haqida xabar berilgan edi.