Бўстонлиқ туманида велоспорт-шоссе бўйича ўтказиладиган Федерация кубоги мусобақаси муносабати билан айрим йўллар вақтинча ёпилади. Бу ҳақда ЙҲХББ маълум қилди.
Қайд этилишича, Тошкент вилоятининг Бўстонлиқ туманида велоспорт-шоссе спорт тури бўйича ўтказиладиган Федерация кубоги мусобақасини самарали ташкил этиш, фуқаролар хавфсизлигини таъминлаш ва транспорт воситалари ҳаракатини вақтинча чеклаш мақсадида 2021 йилнинг 23, 24, 25 июнь кунлари соат 08:00 дан 14:00 га қадар 4Р12 Бектемир—Чирчиқ—Ғазалкент—Чорбоғ қўрғони автомобиль йўлининг 61-километридан (Чимён дам олиш зонасига олиб борувчи йўлга ўтиш жойидан) 73-километригача бўлган оралиғида («Бочка» номли савдо расталари бошланган жойгача) ва 4Р10 Чорвоқ сув омбори ҳалқа йўлининг 0+500 ва 81+700 оралиғида («Фаровон», «Арбат», «Чинарис», «Хожикент» кафелари атрофи) йўлда транспорт воситалари ҳаракати тўлиқ чекланади.
Бўстонлиқ туманининг Чорбоғ қўрғони, Хумсон қишлоқларига ташриф буюрувчи фуқаролар 4Р11 Ғазалкент—Қизилсув—Чорбоғ қўрғони орқали айланиб ўтиши мумкин.
Шунингдек, Юсуфхона, Бурчмулла, Боғистон ва тоғли ҳудудлардаги бошқа қишлоқларга 4Р12 Бектемир—Чирчиқ—Ғазалкент—Чорбоғ қўрғони автомобиль йўлининг 61-километридан 4Р6 Тошкент—Чирчиқ—Чимён автомобиль йўлининг 57-километрига ўтиш жойи орқали айланиб ўтиш мумкин бўлади.
Изоҳ (0)