Bo‘stonliq tumanida velosport-shosse bo‘yicha o‘tkaziladigan Federatsiya kubogi musobaqasi munosabati bilan ayrim yo‘llar vaqtincha yopiladi. Bu haqda YHXBB ma’lum qildi.
Qayd etilishicha, Toshkent viloyatining Bo‘stonliq tumanida velosport-shosse sport turi bo‘yicha o‘tkaziladigan Federatsiya kubogi musobaqasini samarali tashkil etish, fuqarolar xavfsizligini ta’minlash va transport vositalari harakatini vaqtincha cheklash maqsadida 2021-yilning 23, 24, 25-iyun kunlari soat 08:00 dan 14:00 ga qadar 4R12 Bektemir—Chirchiq—G‘azalkent—Chorbog‘ qo‘rg‘oni avtomobil yo‘lining 61-kilometridan (Chimyon dam olish zonasiga olib boruvchi yo‘lga o‘tish joyidan) 73-kilometrigacha bo‘lgan oralig‘ida (“Bochka” nomli savdo rastalari boshlangan joygacha) va 4R10 Chorvoq suv ombori halqa yo‘lining 0+500 va 81+700 oralig‘ida (“Farovon”, “Arbat”, “Chinaris”, “Xojikent” kafelari atrofi) yo‘lda transport vositalari harakati to‘liq cheklanadi.
Bo‘stonliq tumanining Chorbog‘ qo‘rg‘oni, Xumson qishloqlariga tashrif buyuruvchi fuqarolar 4R11 G‘azalkent—Qizilsuv—Chorbog‘ qo‘rg‘oni orqali aylanib o‘tishi mumkin.
Shuningdek, Yusufxona, Burchmulla, Bog‘iston va tog‘li hududlardagi boshqa qishloqlarga 4R12 Bektemir—Chirchiq—G‘azalkent—Chorbog‘ qo‘rg‘oni avtomobil yo‘lining 61-kilometridan 4R6 Toshkent—Chirchiq—Chimyon avtomobil yo‘lining 57-kilometriga o‘tish joyi orqali aylanib o‘tish mumkin bo‘ladi.
Izoh (0)