Ижтимоий тармоқда «ЙПХ ходими йўлнинг ўртасида ҳайдовчини тўхтатиб олган» сарлавҳаси остидаги видеолавҳа тарқалди. ЙҲХББ ушбу видео бўйича маълумот берди.
Қайд этилишича, 2021 йил 19 июнь куни Хоразм вилояти ИИБ ЙҲХБ ЙПХ ходими Э.Ж. Шовот туманида жойлашган тиббиёт бирлашмаси яқинида хизмат олиб бораётган вақтда йўлнинг қатнов қисмида Cobalt русумли автомобиль тўхтаб қолганини кўрган ва ҳайдовчининг олдига борган.
Ҳайдовчи автомобилида носозлик борлигини айтиб, тез фурсатда юргизишини маълум қилган. Тахминан, бир дақиқа вақт ичида ҳайдовчи автомобилни юргизиб, йўлида давом этган.
Мазкур ҳолат атрофдаги номаълум фуқаро томонидан видеога олиниб, ижтимоий тармоқларда асл ҳолатга мос бўлмаган изоҳ билан тарқалмоқда.
«Тармоқларда ўз обуначиларига эга бўлган айрим саҳифа эгаларидан ҳар қандай ҳолатни пухта ва сифатли ўрганмасдан турли изоҳлар билан тарқатмасликларини сўраймиз», — дейилади бошқарма хабарида.
Бундан аввал Сурхондарёда чақирув бўйича кетаётган тез ёрдам машинасини ўтказмаган ЙПХ ходимлари лавозимидан озод этилгани, Сирдарёда ИИБ ходими фуқарога куч ишлатгани тасвирланган видео бундан уч йил олдинги воқеа экани ҳамда Гулистонда маст ҳолда жамоат тартибини бузиб, ИИБ ходимларига қаршилик кўрсатган шахс 5 суткага қамалгани ҳақида хабар берилганди.
Изоҳ (0)