Ўзбекистон ҳудудларида «эрта пишар» сабзи йиғим-терими бошланди, унинг тўлиқ пишиши об-ҳаво шароити туфайли деярли бир ойга кечикди, дея хабар бермоқда Қишлоқ хўжалиги вазирлигига таяниб «Gazeta.uz».
«Оммавий йиғим-терим ишлари июль ойининг дастлабки кунларига режалаштирилган. Бу бозорни янги сабзи билан тўлиқ таъминлашга имкон беради ва уларнинг нархини босқичма-босқич пасайишига олиб келади», – дейилади хабарда.
Маълумот учун, мамлакат бозорларида сабзи нархи кескин кўтарилиб, бир килограмми 15 минг сўмгача етди. Умуман олганда, йил бошидан буён ушбу маҳсулот нархи 60 фоизга ўсган. Қишлоқ хўжалиги вазирлиги буни чет элда сабзи учун юқори нархлар, шунингдек, совуқ об-ҳаво билан изоҳлади.
Қишлоқ хўжалиги вазирлигининг маълумотларига кўра, 2021 йилда умумий майдони 124,4 минг гектарга (2020 йилга нисбатан 18,2 минг гектар кўп) сабзи экиш, жами 2,3 миллион тонна сабзи етиштириш режалаштирилган. Аҳолининг йиллик талаби 800 минг тоннани ташкил этади. Етиштирилган сабзи қолган қисми экспорт қилинади ва қайта ишланади.Маълумот учун, сабзи тупроқ-иқлим шароитига мос равишда Қорақалпоғистон, Жиззах, Тошкент, Қашқадарё, Навоий, Наманган, Сирдарё, Фарғона ва Хоразм вилоятларида экилади.
Изоҳ (0)