Ўзбекистон Президенти Шавкат Мирзиёев 22 июнь куни Барқарор ривожланиш мақсадларини амалга оширишда глобал парламентлараро ҳамкорлик халқаро форумида иштирок этиш учун мамлакатда бўлиб турган Парламентлараро иттифоқ бош котиби Мартин Чунгонгни қабул қилди.
Мамлакатнинг ушбу нуфузли халқаро ташкилот билан шериклигини янада кенгайтириш масалалари кўриб чиқилди.
Давлат раҳбари ижтимоий-иқтисодий ислоҳотларни илгари суриш ва демократик ислоҳотларни чуқурлаштириш, инсон ҳуқуқларини ҳимоя қилиш ва гендер тенгликни таъминлаш, ёшларни қўллаб-қувватлаш каби устувор йўналишларда конструктив мулоқотни давом эттириш ва яқин ҳамкорликни ривожлантириш муҳимлигини таъкидлади.
Ўзбекистон иттифоқ ишидаги иштирокини 2017 йилда қайта тиклагани ва бугунги кунда унинг ижроия тузилмаларида тўлақонли қатнашаётганини таъкидлаш жоиз. 2021 йил Олий Мажлис томонидан Парламентлараро иттифоқ билан кўп қиррали муносабатларни мустаҳкамлаш тўғрисида алоҳида ҳужжат қабул қилинди.
Ўз навбатида, бош котиб Мартин Чунгонг мамлакатда парламентаризмни ривожлантиришдаги сезиларли ютуқларни қайд этди ҳамда Ўзбекистоннинг бу борадаги глобал ташаббусларини юқори баҳолади ва қўллаб-қувватлади.
Илғор хорижий тажрибани кенг алмашиш ва кўп томонлама ҳамкорликнинг катта салоҳиятини рўёбга чиқариш мақсадида қатор халқаро тадбирларни биргаликда тайёрлаш ва ўтказиш юзасидан келишувга эришилди.
Бундан аввал Шавкат Мирзиёев Шавкат Мирзиёев Иброҳим Раисийни Эрон президенти этиб сайлангани билан табриклагани, Татаристон президенти Рустам Миннихановни қабул қилгани ҳамда БАА ҳукумат ишлари бўйича вазири бошчилигидаги делегацияни қабул қилгани ҳақида хабар берилганди.
Изоҳ (0)