Ўзбекистон Президентининг 19 июндаги қарори билан Маданий мерос агентлигининг асосий вазифалари белгиланди, деб хабар бермоқда Адлия вазирлиги матбуот хизмати.
Қарорга мувофиқ, Маданий мерос агентлиги моддий-маданий мерос, музейлар, археология, маданий бойликларнинг олиб чиқилиши ва олиб кирилиши соҳасида махсус ваколатли давлат бошқарув органи ҳисобланади.
Қарорга кўра:
- Соҳага оид норматив-ҳуқуқий ҳужжатлар лойиҳалари ва моддий-маданий мероснинг кўчмас мулк объектлари жойлашган аҳоли пунктларининг бош режалари агентлик билан келишилиши мажбурий ҳисобланади.
- Моддий-маданий мерос объектига етказилаётган зарар ҳақидаги ҳолат бўйича хабардор бўлган пайтдан бошлаб давлат назоратининг дастлабки натижалари 24 соат ичида агентлик расмий сайти орқали жамоатчиликка маълум қилинади.
- Асрашга доир ишларни режалаштириш ва амалга оширишнинг барча босқичларини илмий-техник тадқиқ этиш учун ҳар бир объектнинг ўзига хослиги ва ҳолатидан келиб чиқиб, илмий-техник тадқиқот гуруҳлари тузилади.
- Агентликка туризм ва спорт вазирининг тақдимномасига асосан Вазирлар Маҳкамаси томонидан лавозимга тайинланадиган ва лавозимидан озод этиладиган директор раҳбарлик қилади.
- Моддий-маданий мерос объектлари ва музейлар соҳасидаги давлат хизматларининг айримлари электрон шаклда кўрсатилади.
- Давлат хизматлари учун тўловларни электрон шаклда амалга ошириш орқали квитанция талаб қилиш бекор қилинади.
- Агентлик масъул ходимлари ва фуқаролик-ҳуқуқий шартнома асосида жалб этилган мутахассислар, экспертлар томонидан тегишли кўчмас мулк ва кўчар ашёлар шахсан экспертизадан ўтказилади.
- Экспертиза ўтказиладиган манзил, вақт ва маълумот учун телефон рақамлари ҳамда давлат хизмати кўрсатиш натижаси ҳақида SMS юбориш орқали аризачи хабардор қилинади.
- Давлат хизматини кўрсатиш натижасида бериладиган ҳужжатлар QR-код (матрик штрихли код) қўйиш орқали берилади.
Эслатиб ўтамиз, мазкур агентлик Президентнинг 2021 йил 6 апрелдаги фармони билан ташкил қилинган.
Аввалроқ Ўзбекистонда маданий мерос муҳофазаси кучайтирилиши, Ўзбекистонда ЮНЕСКО билан ҳамкорликда маданий мерос масалалари бўйича Халқаро маслаҳат қўмитаси ташкил этилгани ҳақида хабар берилган эди.
Изоҳ (0)