Навоийда «Олтинсой» тоғ тизмасидан ноқонуний олтин қазиётган 4 киши заҳарланиб ҳалок бўлди, яна 3 киши туман тиббиёт бирлашмасининг жонлантириш бўлимига ётқизилди. Бу ҳақда вилоят ҳокимлиги матбуот хизмати хабар берди.
Аниқланишича, 12 июнь куни Хатирчи туманида яшовчи 7 киши «Олтинсой» тоғ тизмасидан тилла қуми қазиб олиш мақсадида борган ва чуқурликка тушиб, «электродвижок»дан чиққан ёқилғи тутунидан заҳарланиш оқибатида уларнинг 4 нафари воқеа жойида вафот этган. Яна 3 нафар фуқаро туман тиббиёт бирлашмасининг жонлантириш бўлимига ётқизилган.
Қайд этилишича, ҳолат юзасидан Хатирчи туман прокуратураси томонидан терговга қадар текширув ҳаракатлари олиб борилмоқда.
Шунингдек, ноқонуний равишда тилла қумларини қазиб олувчиларни аниқлаш ва бу каби ноқонуний ҳаракатларнинг олдини олиш юзасидан мунтазам равишда ҳуқуқни муҳофаза қилувчи органлар томонидан тадбирлар ўтказилиб, аниқланган ҳуқуқбузарлик ҳолатлари юзасидан тегишли чоралар кўрилмоқда.
2021 йилнинг январида Жиззахда олтин рудасини ноқонуний равишда қазиб олишга уринган тўрт кишини тош босиб қолгани ҳақида хабар берилган эди. Уларнинг 2 нафари воқеа жойида вафот этган, 2 нафари эса турли хил даражадаги синиш ва бошқа тан жароҳатлари билан шифохонанинг жонлантириш бўлимига ётқизилган.
Изоҳ (0)