Самарқанд вилоятидаги текстиль корхоналарининг бирида ишлаган 19 ёшли қиз тунги навбатчиликда зўрлангани ҳақида хабар берилган эди. Вилоят ИИБ матбуот хизмати ҳолат юзасидан жиноят иши қўзғатилганини маълум қилди.
Хабарга кўра, гумонланувчи 28 ёшли А.Ф.га нисбатан Жиноят кодексининг 118-моддаси 1-қисми (номусга тегиш) билан жиноят иши қўзғатилган. Унга нисбатан сиртдан қамоққа олиш тарзидаги эҳтиёт чораси қўлланган.
Ҳозирда тергов ҳаракатлари олиб борилмоқда.
Эслатиб ўтамиз, қизнинг сўзларига кўра, воқеа 23 май куни содир бўлган. Ўша куни у тунги навбатчиликда қолган. Соат кечки 10 дан ўтиб, 11 ларга яқин корхона устаси кириб келиб, ундан коридорга чиқишини сўраган.
«Чиқмасанг бўлмайди деди. Шундан сўнг оёқ-қўлимни боғлаб, машинада олиб кетишди. Ишимизнинг ёнбошида қурилиши битмаган 9 қаватли бино бор эди. Бинонинг атрофида бир-икки одам бор эди. Оғзим боғлаб қўйилгани учун бақиролмас эдим. Ҳолат машинада бўлди», — деган қиз.
Жабрланган қизнинг айтишича, оилада фақат онаси иккови пул топади, отаси ва укаси ҳеч қаерда ишламайди. «Оилавий шароитимиз оғирроқ. Оиламизга моддий ёрдам бўлсин, деб ишламоқчи эдим», — деган у.
Аввалроқ Қашқадарёда қизнинг мастлигидан фойдаланиб унинг номусига тегган шахсга аввал жиноят иши қўзғатиш рад этилди, сўнгра иш қайта очилгани, Сурхондарёда аёл зўрланганини айтиб, ёрдам сўрагани, ҳолат юзасидан экспертиза тайинлангани ҳақида хабар берилган эди.
Изоҳ (0)