Qashqadaryo viloyati Qarshi shahrida mast ayolning nomusiga teggan shaxsga nisbatan jinoiy ish ochildi, deya xabar bermoqda viloyat IIB matbuot xizmati.

Qayd etilishicha, Qarshi shahar, “Mag‘zon” MFYda yashovchi G.R. ismli ayol Qarshi shahar IIO FMB 4-sonli IIB boshlig‘i nomiga ariza bilan murojaat qilib, unda 2020-yil 17-oktabr kuni soat 18:30 larda o‘zining tanishi Yakkabog‘ tumanida yashovchi M.X. bilan Qarshi shahar, “Gulshan” MFYda joylashgan xonadonga birga borib, M.X. bilan birga o‘tirib ovqatlanib, spirtli ichimlik iste’mol qilganini, so‘ngra u mast bo‘lib o‘zini yo‘qotib qo‘yganini, ushbu vaqtda M.X. uning nomusiga tegib, jinsiy aloqa qilganligini bildirib, M.X.ga nisbatan qonuniy chora ko‘rishni so‘ragan.

Mazkur holat yuzasidan to‘plangan hujjatlar Qarshi shahar IIO FMB 4-sonli IIB navbatchilik qismida ro‘yxatdan o‘tkazilib, tergovga qadar tekshiruv harakatlari olib borilgan.

Tekshiruv natijasi bo‘yicha G.R.ning murojaati yuzasidan Jinoyat protsessual kodeksining 83-moddasi 2-bandiga (e’lon qilingan amnistiya akti sodir etilgan jinoyat yoki shaxsga daxldor bo‘lsa, jinoyat ishini tugatish) asosan jinoyat ishi qo‘zg‘atishni rad etish to‘g‘risida qaror qabul qilingan.

Mazkur qaror Qarshi shahar prokuraturasi tomondan nazorat tartibida o‘rganib chiqilib, jinoyat ishi qo‘zg‘atishni rad etish to‘g‘risidagi qarorni bekor qilish to‘g‘risida qaror qabul qilinib, qo‘shimcha tekshiruv harakatlarini olib borish uchun to‘plangan hujjatlar Qarshi shahar 4-sonli IIB TBga yuborilgan.

G.R.ning murojaati bo‘yicha Qarshi shahar 4-sonli IIB Tergov bo‘limi surishtiruvchisi tomonidan qo‘shimcha tergovga qadar tekshiruv harakatlari olib borilib, Qarshi shahar 4-sonli IIB TB tomonidan Jinoyat kodeksining 118-moddasi 1-qismi (nomusga tegish) bilan holat yuzasidan jinoyat ishi qo‘zg‘atilib, dastlabki tergov harakatlari olib borilmoqda.

Bundan avval O‘zbekistonda 2020-yilda voyaga yetmaganlarning 500 nafardan ortig‘i o‘z joniga qasd qilgani, Jasur Umirovga nisbatan jinoyat ishi qo‘zg‘atishni rad qilgan IIB tergovchisiga hayfsan berilgani hamda Termizda maktab o‘quvchisi zo‘rlangani yuzasidan jinoiy ish qo‘zg‘atilgani haqida xabar berilgandi.