Президент матбуот котиби Шерзод Асадов 21 июнь, душанба куни ўтказилган брифингда бошланган ҳафтада давлат раҳбари иштирокида кўплаб тадбирлар бўлиб ўтиши режалаштирилганини таъкидлади. Бу ҳақда «Дарё» мухбири хабар бермоқда.
Айтилишича, бугун 15—16 июль кунлари Тошкентда ўтиши режалаштирилган «Марказий ва Жанубий Осиё: минтақавий ўзаро боғлиқлик. Таҳдид ва имкониятлар» мавзусидаги халқаро конференцияга тайёргарлик бўйича йиғилиш, Тошкент шаҳрини ободонлаштириш ва кўкаламзорлаштириш бўйича тақдимот бўлиши кутилмоқда.
Эртага, 22 июнь куни эса мис ишлаб чиқаришни янада ривожлантириш ҳамда саноат кластерини ташкил этиш юзасидан йиғилиш ўтказилади. 23 июнь куни Янги Ўзбекистон университетини ташкил этиш чора-тадбирлари юзасидан тақдимот ташкил этилади.
Шунингдек, тармоқ ва ҳудудларда инвестиция лойиҳалари ижроси ҳамда маҳаллий саноат лойиҳаларини жадаллаштириш масалалари юзасидан видеоселектор ҳам кўзда тутилган. Шерзод Асадов давлат раҳбари ушбу ҳафтада Тошкент шаҳрида амалга оширилаётган бунёдкорлик ишлари билан танишишини ҳам маълум қилди.
Эслатиб ўтамиз, ўтган ҳафтанинг 17—18 июнь кунлари Президент расмий ташриф билан Андижон вилоятида бўлган эди.
Изоҳ (0)