Аргентинада биринчи марта «қора замбуруғ»га чалиниш ҳолати аниқланди

Аргентинада биринчи марта «қора замбуруғ» (мукормикоз)га чалиниш ҳолати қайд этилди. Касаллик COVID-19’дан тузалган аёлда аниқланган. Бу ҳақда мамлакат Соғлиқни сақлаш вазирлигига таяниб, «РБК» хабар берди.

«Мукормикоз билан касалланишнинг биринчи ҳолати Формоза шаҳрида яшовчи илгари COVID-19 билан оғриган беморда аниқланди», — дейилади хабарда.

47 ёшли бемор аёл, юқори қон босимидан азият чеккан, шунингдек, у қандли диабетнинг 2-типи ва COVID-19 билан касалланган. Коронавирусдан тузалганидан сўнг, аёлнинг боши оғриб, танглай сезувчанлиги бузилган. Текширувдан сўнг аёлда хавфли замбуруғлар аниқланди.

Вазирликнинг қўшимча қилишича, мукормикоз билан касалланишнинг яна бир ҳолати текширилмоқда. Гап Буэнос-Айрес провинциясида вафот этган шахс ҳақида кетмоқда.

Маълумот учун, мукормикоз табиатда кенг тарқалган микроскопик замбуруғлар (мукормицетлар) келтириб чиқарадиган ноёб инфекция. Улар тупроқда яшайди, кўпинча чириган ўсимликлар ва сабзавотлар юзасида ажралиб туради.

Ушбу инфекция бурун, кўз ва нафас олиш тизимига таъсир қилади. Касаллик бурун бўшлиғи ва бурун ёндош бўшлиқларида ривожланиб, кўз косаларига тарқалади. Инфекция тушган аъзоларда, айниқса, бурунда тўқима некрози туфайли ўзига хос қора қўтир пайдо бўлади. Даво чоралари кўрилмаган тақдирда мукормикоз тўсатдан ўлимга олиб келиши мумкин, шу билан бирга, терапия ёрдамида беморларнинг фақат 50 фоизини сақлаб қолиш мумкин.