Hindistonda shifokorlar koronavirusga chalingan bemorda zamburug‘ kasalligining yana bir turi — “yashil zamburug‘”ni aniqladi. Mamlakatda ilgari “qora”, “oq” va “sariq zamburug‘” qayd etilgan, deb yozadi “Korrespondent.net”.

Xabarga ko‘ra, “yashil zamburug‘” bilan kasallanish holati Indaur shahrida qayd etilgan, kasallik so‘nggi bir yarim oy davomida shahar kasalxonasida davolanayotgan 34 yoshli erkakda aniqlangan.

Bemor o‘pkasining 90 foizi koronavirus infeksiyasi bilan zararlangan edi. U koronavirusdan tuzalgan, ammo ko‘p o‘tmay erkakda burun qonashi va yuqori harorat kuzatila boshlagan.

Shifokorlar uni mukormikoz (“qora zamburug‘”) bilan og‘rigan deb o‘ylagan. Ammo tekshiruvlardan so‘ng bemorda “yashil zamburug‘” borligi aniqlandi. “Yashil zamburug‘”  — zamburug‘ kasalliklariga kiruvchi aspergillezning bir turi.

“Tashxis mobaynida uning o‘pkasida mukormikozdan farq qiluvchi ‘yashil zamburug‘’ topildi. Bu mamlakatda ‘yashil zamburug‘’ga chalinish bo‘yicha birinchi holat bo‘lishi mumkin”, — dedi shahar Sog‘liqni saqlash departamenti vakili Apurva Tivari.

Eslatib o‘tamiz, Hindistonda COVID pandemiyasi fonida odamlarning xavfli zamburug‘larga chalinish holatlari ko‘paydi. Mamlakatda koronavirus tarqalishining ikkilamchi ta’siri sifatida paydo bo‘lgan “qora zamburug‘” epidemiyasi fonida yana bir zamburug‘ kasalligi aniqlandi, u mamlakatda “oq zamburug‘” deb ataladi.

May oxirida Hindiston shifokorlari koronavirusga chalingan bemorda zamburug‘ infeksiyasining uchinchi turi — “sariq zamburug‘”ni aniqladi. Mamlakatda “sariq zamburug‘” bilan kasallangan birinchi bemor vafot etdi.