Ижтимоий тармоқларда йўловчи ташиш вагонларига кондиционерлар ўрнатиш масаласи кўп муҳокама қилинмоқда. Шуни инобатга олиб, йўловчи поездларидаги камчиликларни бартараф этиш бўйича комиссия тузилди. Бу ҳақда «Ўзбекистон темир йўллари» матбуот хизмати хабар қилди.
Қайд этилишича, 10 июнь куни «Ўзбекистон темир йўллари» АЖ бошқарув раиси вазифасини бажарувчи Х.Н. Хасилов бошчилигида ишчи комиссия «Тошкент йўловчи вагонларини қуриш ва таъмирлаш заводи» АЖга ташриф буюрди.
Ташриф давомида мавжуд муаммоларни ҳал қилиш учун қуйидаги чоралар кўрилди:
Биринчидан, поезд ўз манзилига кетишидан олдин 40 дақиқалик вақт оралиғида манёврлар (локомотивни йўловчи вагонларидан узиб қўйиш) ўтказишга қарор қилинди, бу эса ўз навбатида йўловчи вагонларининг электрсиз туриш вақтини камайтиради, чунки кондиционер тизими локомотивсиз ишлай олмайди.
Иккинчидан, «Ўзтемир йўлйўловчи» АЖ бош директори ва унинг ўринбосарларига йўловчи поездларида текширув сафарларини ўтказиш ва вагонларда кондиционер тизими ишлашини шахсан текшириш топширилди.
Учинчидан, йўналишларда йўловчиларга ўз вақтида биринчи тиббий ёрдам кўрсатиш мақсадида ҳар бир йўловчи вагонлари таркибига тиббиёт ходимларини бириктириш вазифаси қўйилди. Таъкидланишича, поездларда тиббиёт ходимлари билан бундай амалиёт бошқа мамлакатларда қўлланилмайди.
Вагонларни реконструкция қилиш, шунингдек, уларни модернизация қилиш белгиланган тартибда ва тасдиқланган жадвалларга мувофиқ амалга оширилади.
Бундан ташқари, қайд этилишича, икки кун давомида (2021 йилнинг 5–6 июнь кунлари) ишонч телефонига 3000 мингдан ортиқ қўнғироқ келиб тушган. Шулардан фақат 2 та қўнғироқ поезднинг кондиционер тизимидаги муаммолар билан боғлиқ бўлиб, 5 та қўнғироқ қўнғироқ қилувчилар томонидан ишонч телефони оператори жавоб бергунига қадар рад этилган.
Изоҳ (0)