Жиззах вилояти Шароф Рашидов туманида Туркия давлатига бориб ишлаш учун «Olx.uz» сайти орқали йўл қидирган 34 ёшли фуқарони чув туширган шахс қўлга олинди. Бу ҳақда ИИВ Киберхавфсизлик маркази хабар берди.
Маълум қилинишича, 34 ёшли М.И. Туркияга бориб ишлаш тўғрисидаги маълумотларни расмий меҳнат агентликлари орқали эмас, балки «Olx.uz» орқали излаган. Ўз навбатида М.И. сайтда «Туркия давлатига ишга юборимиз» номли эълонга дуч келган ва Жамшид исмли шахс билан танишиб қолган.
М.И. эълонни жойлаштирган шахс билан мулоқотга киришган ва у эркакка Туркияга ишга юбориб, ойига 1000—1500 АҚШ доллари миқдорида ойлик маош тўлайдиган иш ўрни топиб беришни ваъда қилган. Жамшид бунинг учун М.И.дан Туркия давлатига бориш учун виза ва йўл харажатлари учун аввалдан 500 АҚШ доллари зарурлигини билдирган.
М.И. танишларидан 1,5 миллион сўм маблағ тўплаган ва ушбу пулларни ўзи бирон маротаба юзма-юз кўриб гаплашмаган, фақат Telegram ижтимоий тармоғида ёзишмалар орқали танишган Жамшиднинг пластик картасига ташлаб берган. Жамшид маблағни қўлга киритгандан сўнг М.И. билан ўзаро ёзишмаларни ўчириб ташлаган ва у билан алоқани тўхтатган.
Жабрланувчининг Президент порталига йўллаган мурожаати Фарғона вилояти Фарғона шаҳар ИИО ФМБ томонидан кўриб чиқилиб, номаълум шахсга нисбатан фирибгарлик билан жиноят иши қўзғатилган ва тергов ҳаракатлари давомида Жамшидни аниқлашнинг имкони бўлмаган.
Фуқаро М.И.нинг Президент порталига мурожаати ижобий ҳал этилишини таъминлаш ва Жамшид исмли шахснинг жиноий ҳаракатларига чек қўйиш орқали фуқароларнинг ундан жабр кўришининг олдини олиш мақсадида мазкур жиноятни содир этиш усуллари Ички ишлар вазирлиги Киберхавфсизлик маркази ходимлари томонидан Фарғона шаҳар ИИО ФМБга бориб ўрганиб чиқилган.
Жиноятни содир этиш услублари таҳлилига таянган ҳолда ўтказилган тезкор-техник тадбирлар натижасида, ушбу фирибгарлик жинояти Фарғона вилояти Фарғона шаҳрида яшовчи, 24 ёшли Т.Ж. томонидан содир этилгани аниқланиб, қўлга олинган.
Натижада Т.Ж.нинг «Olx.uz» платформасидаги жиноий фаолиятига барҳам берилган, ҳозирда унга нисбатан Фарғона шаҳар ИИО ФМБ ҳузуридаги тергов бўлими томонидан тергов ҳаракатлари олиб борилмоқда.
Аввалроқ Тошкентда қалбаки валюталар эвазига телефон харид қилиб, ўнлаб фуқароларни чув туширган шахс қўлга олингани, Самарқандда фуқарони 50 минг долларга чув туширган адвокат устидан жиноят иши қўзғатилгани, Қашқадарёда 14 ёшли қизнинг «бошини айлантириб», отасига тегишли 7,3 минг долларни қўлга киритган йигит ушлангани тўғрисида хабар берилганди.
Изоҳ (0)