Ўзбекистонда 24 та туман (шаҳар) қурилиш материаллари ишлаб чиқаришга ихтисослаштирилади ва уларда «кичик саноат зоналари» ташкил этилади. Бу ҳақда Президентнинг 9 июндаги «Ҳудудларнинг саноат салоҳиятини оширишга доир қўшимча чора-тадбирлар тўғрисида»ги фармонида кўзда тутилган.
Қурилиш материаллари ишлаб чиқаришга ихтисослашган туманлар (шаҳарлар) рўйхати:
- Қораўзак тумани (Қорақалпоғистон);
- Булоқбоши тумани (Андижон);
- Пешку ва Қоровулбозор туманлари (Бухоро);
- Фориш тумани (Жиззах);
- Китоб ва Деҳқонобод туманлари (Қашқадарё);
- Зарафшон ва Ғозғон шаҳри, Учқудуқ тумани (Навоий вилояти);
- Уйчи, Учқўрғон, Чуст ва Поп туманлари (Наманган);
- Нуробод ва Пахтачи туманлари (Самарқанд);
- Ховос тумани (Сирдарё вилояти);
- Бойсун, Шеробод ва Сариосиё туманлари (Сурхондарё);
- Оҳангарон (Тошкент вилояти);
- Ўзбекистон тумани (Фарғона);
- Ҳазорасп ва Тупроққалъа туманлари (Хоразм).
Хусусан, инвестиция лойиҳаларини амалга ошириш доирасида, шу жумладан, айланма маблағларни тўлдириш учун бериладиган банк кредитлари суммасининг 50 фоизигача, бироқ 15 миллиард сўмдан кўп бўлмаган миқдорда кафолатлар берилади.
Шунингдек, қурилиш материаллари ишлаб чиқариш корхоналарига берилган кредитлар бўйича фоиз харажатларини қоплаш учун:
- миллий валютадаги кредитлар бўйича — Марказий банкнинг асосий ставкасидан ошадиган, бироқ 10 фоиз пунктидан кўп бўлмаган миқдорда;
- чет эл валютасидаги кредитлар бўйича — тижорат банклари томонидан белгиланган ставканинг 50 фоизи, бироқ 4 фоиз пунктидан кўп бўлмаган миқдорда;
- синов лабораторияси ускуналарини сотиб олиш ва халқаро сифат менежменти стандартларини жорий этиш харажатларини қоплаш учун компенсациялар ажратилади.
Тикланиш ва тараққиёт жамғармасидан «Ўзсаноатқурилишбанк»ка қурилиш материаллари саноатидаги лойиҳаларни молиялаштириш учун 200 миллион доллар миқдорида кредит ажратилади.
Ҳудудларни ижтимоий-иқтисодий ривожлантириш учун кўзда тутилган маблағлар ҳисобидан 2021 йилда ихтисослаштирилган туманларда саноат инфратузилмасини ривожлантириш учун 400 миллиард сўм, геология-қидирув ишларини олиб бориш учун 100 миллиард сўм ажратилади.
Давлат геология ва минерат ресурслар қўмитаси 2021 йил 1 октябрга қадар кимошди савдолари натижаларига кўра, 500 та норуда фойдали қазилмалар конларининг инвесторларга фойдаланишга берилишини таъминлайди.
Изоҳ (0)