New Balance бренди пиво банкалари учун мўлжалланган кроссовкаларни ишлаб чиқарди

New Balance номли спорт бренди Miller Lite билан биргаликда пиво банкалари учун кроссовка — Shoezie’ни тақдим этди, деб хабар беради Esquire.

Ушбу ном ичимлик банкасининг тезда исиб қолмаслигини таъминлаш учун керак бўладиган енг маъносини берувчи koozie сўзидан олинган. Кроссовка ҳам худди шу функцияни бажариб, банка ҳароратининг барқарор туришини таъминлайди. Кроссовка дизайни New Balance 624 модели асосида яратилган бўлиб, ранги Miller Lite банкаси рангларини такрорлайди.

Пиво учун мўлжалланган кроссовканинг ҳамкорликдаги модели АҚШ ва дунёнинг айрим мамлакатларида 20 июнь куни нишонланадиган Оталар куни учун махсус ишлаб чиқарилган. «Биргаликда газонни калталаган, грилда идеал гўшт пиширган, итларни парвариш қилган барча оталарга миннатдорчилик билдиришни хоҳлаймиз», — дейди Miller компаниясининг маркетинг бўйича раҳбари София Колуччи.

Ушбу кроссовкани харид қилишнинг имкони йўқ, бироқ махсус сайт орқали ариза қолдириб, ютиб олса бўлади.

Аввалроқ Nike бренди PlayStation 5’дан илҳомланилган кроссовкаларини тақдим этгани, рэпер Томми Кеш ва Adidas Originals узунлиги 1 метрни ташкил қиладиган кроссовка яратгани, Японияда педикюр қилинган оёқ кўринишидаги ботинкалар ишлаб чиқарилгани ҳақида хабар берилганди.