New Balance nomli sport brendi Miller Lite bilan birgalikda pivo bankalari uchun krossovka — Shoezie’ni taqdim etdi, deb xabar beradi Esquire.
Ushbu nom ichimlik bankasining tezda isib qolmasligini ta’minlash uchun kerak bo‘ladigan yeng ma’nosini beruvchi koozie so‘zidan olingan. Krossovka ham xuddi shu funksiyani bajarib, banka haroratining barqaror turishini ta’minlaydi. Krossovka dizayni New Balance 624 modeli asosida yaratilgan bo‘lib, rangi Miller Lite bankasi ranglarini takrorlaydi.
Pivo uchun mo‘ljallangan krossovkaning hamkorlikdagi modeli AQSh va dunyoning ayrim mamlakatlarida 20-iyun kuni nishonlanadigan Otalar kuni uchun maxsus ishlab chiqarilgan. “Birgalikda gazonni kaltalagan, grilda ideal go‘sht pishirgan, itlarni parvarish qilgan barcha otalarga minnatdorchilik bildirishni xohlaymiz”, — deydi Miller kompaniyasining marketing bo‘yicha rahbari Sofiya Koluchchi.
Ushbu krossovkani xarid qilishning imkoni yo‘q, biroq maxsus sayt orqali ariza qoldirib, yutib olsa bo‘ladi.
Avvalroq Nike brendi PlayStation 5’dan ilhomlanilgan krossovkalarini taqdim etgani, reper Tommi Kesh va Adidas Originals uzunligi 1 metrni tashkil qiladigan krossovka yaratgani, Yaponiyada pedikyur qilingan oyoq ko‘rinishidagi botinkalar ishlab chiqarilgani haqida xabar berilgandi.
Izoh (0)