Жонс Ҳопкинс университети маълумотларига кўра, дунёда коронавирусга чалинганлар сони 173 329 556 кишини ташкил қилмоқда, шуларнинг 3 729 870 нафари вирус қурбонига айланган. Касалланиш ҳолатларининг кўплиги бўйича АҚШ (33,3 миллион), Ҳиндистон (28,9 миллион), Бразилия (16,9 миллион), Франция (5,7 миллион) ва Туркия (5,2 миллион) бормоқда.
Фото: Reuters
Хитой 3 ёшдан ошган болаларни коронавирусга қарши эмлашни бошлайди
Хитой COVID-19’га қарши Sinovac Biotech вакцинасини 3-17 ёшли болалар учун қўллашга рухсат берди.
17 ёшгача бўлган 500 дан ортиқ болалар иштирокидаги клиник синовлар натижаларига кўра, вакцина болаларда иммун реакциясини келтириб чиқариши мумкин, иккиламчи таъсирлар эса асосан енгил кечган.
Sinovac вакцинасининг 3-17 ёшли болаларни эмлашда қачондан қўллана бошланиши номаълум, бу Хитой соғлиқни сақлаш органлари томонидан қабул қилинадиган вакцинация стратегиясига боғлиқ бўлади.
Мавзуга доир: ЖССТ Хитойнинг коронавирусга қарши Sinovac вакцинасини маъқуллади. Бу ташкилот томонидан маъқулланган еттинчи вакцинадир
Малайзияда иситмаси баланд одамларни қидиришда дронлар қўлланилмоқда
Коронавируснинг олдини олиш мақсадида Малайзия ҳукумати иситмаси баланд бўлган одамларни аниқлаш учун дронлардан фойдаланмоқда.
Инфрақизил датчиклар билан жиҳозланган сканерловчи дронлар 20 метргача баландликда туриб, одамларнинг ҳароратини ўлчаши ва кимнингдир иссиғи ошгани ҳақида огоҳлантириши мумкин.
Аввалроқ Малайзия ҳукумати COVID-19’га қарши чораларга риоя қилиниши устидан назорат олиб бориш учун дронлардан фойдаланиши мумкинлиги ҳақида огоҳлантирган эди.
Исроилда ниқоб режими бекор қилинади
Исроилда 15 июндан ниқоб режими бекор қилинади. Мактаблар бундан мустасно. Исроилда 1 июнданоқ деярли барча чекловлар олиб ташланган эди.
«Қатор муҳокамалардан кейин шундай хулосага келдикки, агар яқин кунларда COVID-19 тарқалиши билан боғлиқ вазият ва тегишли кўрсаткичлар ёмонлашмаса, биз 15 июндан биноларда ниқоб тақиш мажбуриятини бекор қиламиз», — деди Исроил соғлиқни сақлаш вазири Юлий Эделштейн.
