Нигериянинг федерал ҳукумати 2 июнь куни тармоқдан мамлакат президенти Муҳаммад Бухорийнинг хабарларидан бирини ўчириб юборгани учун Twitter компаниясини айблади. Бу ҳақда Африканинг Sahara Reporters янгиликлар портали хабар берди.
«Twitter’нинг ўз қоидалари бўлиши мумкин, лекин улар барчага тегишли эмас. Агар дунёдаги бирор давлатнинг президенти ўз мамлакатида юзага келадиган вазиятдан хавотирда бўлса, у ўз фикрларини бемалол билдириши мумкин», — деди Нигериянинг ахборот ва маданият вазири Лай Муҳаммад.
Twitter 2 май куни Нигерия президентининг ҳукумат биноларига қилинган ҳужумлар учун айирмачиларни жазолаш билан таҳдид қилган постини ўчириб юборди, деб ёзмоқда Reuters. Муҳаммад Бухорийга 1967—70 йилларда, айирмачилар исёни ва Биафра штатининг ташкил топганидан кейин Нигериянинг жануби-шарқида юз берган фуқаролар уруши ҳақидаги эслатма расмий сабаб бўлди. Урушда 1 миллиондан ортиқ одам ҳалок бўлган эди. Компания ўз изоҳида Нигерия президенти Twitter’даги «ҳақоратли хатти-ҳаракатлар» низомини бузганини айтди. Натижада президентнинг пости ўчирилиб, аккаунти 12 соатга блокланди.
Ўтган ҳафтада Нигериянинг жануби-шарқида айирмачилар полиция участкалари ва давлат биноларига бир неча марта ҳужум уюштирди. Ҳужум натижасида полициячилар ва ҳарбий хизматчилар қурбон бўлди. «Биафранинг маҳаллий халқи» айирмачи ташкилотининг раҳбарлари жанубий Нигерия аҳолисини фуқаролар урушида қурбон бўлганлар хотирасига бағишлаб, ишлашни бир кунга тўхтатишга чақиргандан сўнг бу федерал ҳукумат томонидан айирмачилик кайфиятини тиклашга уриниш сифатида қабул қилинди ва Муҳаммад Бухорий Twitter’га бир қатор постлар жойлади. «Биз каби 30 ойлик фуқаролик урушини бошидан кечирганлар улар билан фақат улар тушунадиган тилда гаплашади», — деб ёзди Бухорий ўзининг Twitter саҳифасига жойлаган постлардан бирида. Айнан ўша хабарлар тармоқдан ўчирилди.
Аввалроқ Twitter хизмати АҚШ собиқ президенти Дональд Трампнинг расмий веб-сайтидаги баёнотларни чоп этган DJTDesk аккаунтини блоклаб қўйгани ҳақида хабар берилди.
Изоҳ (0)