Pokiston Ichki ishlar vazirligi mamlakat telekommunikatsiya boshqarmasiga ijtimoiy tarmoqlar va messenjerlar — Twitter, Facebook, WhatsApp, YouTube va Telegram’ni vaqtincha blokirovka qilishni buyurdi. Bu haqda Dawn nashriga tayanib “Kommersant” xabar berdi.

Foto: Google Images

Xabarga ko‘ra, blokirovka 16-aprel, juma kuni mahalliy vaqt bilan soat 11:00 dan 15:00 gacha (Toshkent vaqti bilan bir xil) amal qilgan. Bloklanish sababi rasmiy ravishda ma’lum qilinmagan, nashr buni norozilik namoyishlari bilan bog‘lamoqda.

Pokiston telekommunikatsiya boshqarmasi “jamoat tartibi va xavfsizligini ta’minlash uchun” ba’zi ijtimoiy tarmoqlarga kirishni cheklash kerakligini aytmoqda. Nayatel internet provayder xizmati mijozlarga platformalarni Ichki ishlar vazirligining ko‘rsatmalariga binoan to‘sib qo‘yganini aytdi.

Dawn nashri blokirovkani Pokistondagi “Texrik-i-Labbayk” o‘ta o‘ngchi islomiy harakatning taqiqlanishidan keyingi voqealar bilan bog‘liq deb hisoblamoqda. Harakat terroristik tashkilot deb tan olingan va faoliyatiga taqiq qo‘yilgan edi. Tashkilot rahbari Saad Husayn Rizvi hibsga olingan. Ko‘chalarda harakat tarafdorlarining noroziliklari boshlanib, oqibatda yetti kishi halok bo‘lgan, 300 dan ortiq politsiya xodimi jarohat olgan.

Avvalroq Pokiston sud qaroridan keyin TikTok ijtimoiy tarmog‘ini bloklashi haqida xabar berilgan edi. Peshavor shahri yuqori sudining ta’kidlashicha, sud tarmoqning axloqsiz kontent tarqatayotgani haqidagi arizachining dalillari bilan tanishib, dasturni bloklash to‘g‘risida buyruq bergan. TikTok’ning Pokistondagi vakilining aytishicha, u sud qarori haqida eshitgan va kompaniya keyinroq bu masala yuzasidan izoh beradi.