Саратоннинг олдини олиш учун нима ейиш ва емаслик керак?

Ҳеч қайси маҳсулот саратон келиб чиқиши хавфини 100 фоизга камайтирмайди, аммо қайсиларидандир тийилиш, бошқаларини эса аксинча канда қилмасликнинг уддасидан чиқилса, ривожланиш хавфини камайтириш мумкин бўлади.

Саримсоқ пиёз

Таркибида иммунитетнинг ҳимоя хусусиятини яхшилайдиган олтингугурт сулфати мавжуд экани ҳисобига ҳам шифокорлар саримсоқни таомларга қўшиб тез-тез истеъмол қилиш кераклигини таъкидлайди. Тадқиқотларда саримсоқни мунтазам равишда истеъмол қилиш ошқозон саратонини 12 фоизга камайтириши аниқланган.

Брокколи

Хавфли касалликларнинг олдини олиш хусусиятига эга бўлган мазкур карам турини нима бўлганда ҳам, микротўлқинли печда пишириш тавсия қилинмайди. Гап шундаки, бундай тайёрланганда организмни ҳимоя қиладиган 97 фоиз флавоноидга зарар етади.

Бразилия ёнғоғи

Ушбу маҳсулот саратон ҳужайраларини шикастлайдиган ва колоректал саратоннинг ривожланиш хавфини камайтирадиган микроэлемент – селеннинг кони саналади. Корнел ва Аризона университети мутахассислари иштирок этган тадқиқотда кун давомида атиги иккита артилмаган Бразилия ёнғоғини истеъмол қилиш эркаклардаги саратонни 63 фоизга, колоректал хавфли ўсимталарни 58 фоизга, шунингдек, бошқа саратон турларини 46 фоизга камайтириши аниқланган.

Цитрус мевалар

Лимон, апельсин ва грейпфрутларни мунтазам равишда истеъмол қилиш ҳиқилдоқ, ошқозон ва оғиз бўшлиғи ҳамда қизилўнгач саратонининг келиб чиқиш хавфини сезиларли даражада камайтиради.

Черника

Черника таркибида соғлом ҳужайраларни шикастлаб, турли хавфли касаллик ҳамда саратоннинг келиб чиқишига сабаб бўладиган радикаллар таъсирини нейтраллаштирадиган антиоксидантлар мужассам бўлади. Тадқиқотларда черника нафақат барра, балки қуритилган ҳолда ҳамда мураббо қилинганда ҳам фойдали хусусиятларини сақлаб қолиши аниқланган.

Балиқ

Исталган ёғли балиқ маҳсулотининг ҳафта давомида атиги тўрт порцияси лейкемия ва лимфомани учдан бирга қисқартириши маълум қилинган. Қолаверса, ёғли балиқни канда қилмаслик бачадон саратони келиб чиқиш хавфини ҳам камайтиради.

Киви

Киви C ва Э витамини, шунингдек, лютеин ва эркин радикалларнинг таъсирини нейтраллаштирадиган ва саломатликни ҳимоя қиладиган антиоксидантларнинг кони.

Чой

Кун давомида истеъмол қилинган 2 финжон чой тухумдонлар саратони ривожланишининг олдини олади. Тадқиқотчилар ҳамма гап чой таркибида бисёр бўлган антиоксидант бирикма — флавоноидларда деб тахмин қилади.

Олма

Олма таркибидаги антиоксидант процианидиналар саратон ҳужайраларини йўқ қилади. Олмани қанча кўп истеъмол қилсангиз, шифокорга шунча кам мурожаат қилишингизга тўғри келади.

Онколог шифокорлар қуйида номи келтирилган маҳсулотлардан воз кечиш ёки иложи борича камроқ истеъмол қилиш кераклигини таъкидлайди.

Қайта ишланган гўшт маҳсулотлари

Бутунжаҳон соғлиқни сақлаш ташкилоти мутахассислари колбаса ва қайта ишланган гўшт маҳсулотларини кансероген сифатида расмий равишда ажратди. Эълон қилинган ҳисоботда таъкидланганидек, ҳар куни атиги 50 грамм қайта ишланган гўшт ичак саратони хавфини 18 фоизга оширади. Бундан ташқари, ушбу маҳсулотлар танага кириб, хавфли касалликка чалиниш эҳтимолини оширади.

Бодроқлар

Микротўлқинли печда тайёрланган бодроқ энг хавфли ҳисобланади. Гап шундаки, уни тайёрлашда буғи таркибида хавфли диацит бирикмаси мавжуд бўладиган ҳамда ўпка саратонига олиб келадиган синтетик ёғдан фойдаланилади. Айнан диацит бодроққа ўзгача таъм беради ва инсонда яна истеъмол қилиш ҳиссини пайдо қилади.

Лосос

Махсус фермаларда етиштириладиган лосос балиғи арзон бўлиши билан бирга, соғлиқ учун ҳам зарарлидир. Ушбу турдаги балиқ гўшти таркибида хавфли ўсмалар пайдо бўлиш хавфини оширадиган токсик моддалар мавжуд.

Кўмирда пиширилган гўшт маҳсулотлари

Юқори ҳароратда пишириладиган кабоб, товуқ ва шу каби бошқа маҳсулотлар соғлиқ учун зарарли бўлган кансероген моддаларнинг пайдо бўлишига олиб келади. Лекин бу улардан бутунлай воз кечиш кераклигини билдирмайди, меъёр билинса ва гўштнинг пишиш жараёнида қорайган қисмидан тийилса кифоя.

Сунъий таъм берувчилар

Организмга кирганидан кейин метаболизмга таъсир қилиши, юрак хуружи хавфини ошириши ва кансероген ҳисоблангани сабаб ҳам ҳар қандай шакар ўрнини босувчи, таъм берувчи моддалардан иложи борича тезроқ воз кечган яхши. Шунингдек, шакарни ҳаддан ортиқ истеъмол қилиш ҳам саратон ҳужайралари кўпайишини жадаллаштиради.

Спиртли ичимликлар

Спиртли ичимликларни мунтазам равишда истеъмол қилиш мия, қизилўнгач, жигар ва сут бези саратонининг ривожланишига ҳисса қўшади.

Трансёғлар

Трансёғлар одатда суюқ ёғларни гидрогенлаш орқали қаттиқ ёғларга айлантирилганда ҳосил бўлади. Бу маҳсулотнинг яроқлилик муддатини узайтиради ва унинг таъмини барқарорлаштириш мақсадида амалга оширилади. Шундан сўнг улар маргарин, ёрмалар, ширинликлар, чипс, газак ва турли хил салат қўшимчалари каби маҳсулотлар таркибида кенг қўлланилади. Ҳаёти ва саломатлигини хавф остига қўйишни хоҳламайдиганлар таркибида трансёғлармавжуд бўлган маҳсулотлардан тийилиши керак.