Сурия Инсон ҳуқуқларига риоя қилиниши уcтидан назорат маркази (SOHR) ҳисоб-китобларига кўра, фуқаролик уруши бошланганидан буён 10 йил давомида мамлакатда 494 438 киши ҳалок бўлди. SOHR баённомасида маълум қилинишича, ҳалок бўлганларнинг 160 минг нафари тинч аҳоли, шу жумладан, 25 минг нафарини 18 ёшгача бўлган болалар ташкил қилади.
Бундан ташқари, 80 мингга яқин суриялик исёнчилар, 91 минг нафар Сурия армияси ҳарбийси, 40 минг нафар ИШИД ва 28 мингга яқин «Ҳайят Таҳрир аш-Шом» гуруҳи жангарилари ҳалок бўлди.
SOHR ҳисоб-китобларига кўра, бу вақт ичида Суриянинг 2,1 миллиондан ортиқ аҳолиси турли даражадаги жароҳатлар олди ёки ногирон бўлиб қолди. Тахминан, 13 миллион аҳоли доимий яшаш жойларини тарк этишга мажбур бўлди.
Аввалроқ Россия Ҳаво-космик кучлари (ҲКК) самолётларининг Суриядаги авиазарбаси оқибатида, тахминан, 200 нафар жангари йўқ қилинди. Натижада террорчиларнинг иккита яширин жойи, йирик калибрли пулемёт билан жиҳозланган 24 та пикапи, шунингдек, тахминан, 500 килограмм ўқ-дори ва қўлбола портловчи мосламаларни ясаш учун зарур қисмлар йўқ қилинди.
Шунингдек, Ироқ Қуролли Кучлари ИШИД етакчиларидан бири — «Дажла амири»ни қўлга олди. Ундан олдин Ироқда АҚШ бошчилигидаги халқаро коалиция томонидан амалга оширилган авиазарба оқибатида ҳам ИШИД террорчилик ташкилотининг раҳбарларидан бири ўлдирилган эди.
Изоҳ (0)