Rossiya Havo-kosmik kuchlari (HKK) samolyotlarining Suriyadagi aviazarbasi oqibatida, taxminan, 200 nafar jangari yo‘q qilindi. Bu haqda Mudofaa vazirligining Nizoli tomonlarni yarashtirish va qochqinlar harakatini nazorat qilish markaziga tayanib, “RBK” xabar berdi.

Foto: “TASS”

“Bir nechta kanallar orqali terrorchilar obyektlarining joylashuv o‘rni aniqlangach, Rossiyaning HKK samolyotlari orqali havo zarbalari berildi”, — deyiladi xabarda.

Natijada terrorchilarning ikkita yashirin joyi, yirik kalibrli pulemyot bilan jihozlangan 24 ta pikapi, shuningdek, taxminan 500 kilogramm o‘q-dori va qo‘lbola portlovchi moslamalarni yasash uchun zarur qismlar yo‘q qilindi.

Rossiyalik harbiylarning ma’lumotlariga ko‘ra, mamlakatdagi vaziyatni izidan chiqarishni maqsad qilgan jangarilar Suriyadagi prezidentlik saylovlari arafasida yirik shaharlardagi davlat idoralariga qarshi terakt va hujumlarni rejalashtirgan. Hujumlar Palmiraning shimoli-sharqidagi yashirin bazada tayyorlanayotgan edi, deb xabar berdi Tomonlarni yarashtirish markazi.

“Terrorchilarni tayyorlash Suriya hukumati tomonidan nazorat qilinmaydigan hududlarda, shu jumladan, At-Tanf zonasidagi harbiylarning o‘quv lagerlarida olib borilmoqda”, — deb axborot berdi Mudofaa vazirligi.

Mart oyining oxirida Rossiya harbiylari “Hayot Tahrir ash-Shom” terrorchi tashkilotining jangarilari Suriyaning Idlib provinsiyasida kimyoviy hujum uyushtirishni rejalashtirgani haqida xabar bergan edi. Bu orqali terrorchilar Suriya hukumatini fuqarolarga hujum qilishda ayblamoqchi bo‘lgan.

Avvalroq Nigeriyaning shimoli-sharqidagi Borno shtatida “Boko haram” jangarilari navbatdagi qurolli hujumni amalga oshirgandi. Natijada 18 kishi halok bo‘lib, 21 kishi jarohatlangan.