Айни пайтда Президент Шавкат Мирзиёев раислигида ўтказилаётган Сурхондарё халқ депутатлари вилоят кенгашининг навбатдан ташқари сессияси бошида давлат раҳбари COVID-19 ҳақида гапирди. Бу ҳақда «Дарё» мухбири хабар бермоқда.
«Биз ҳозир синовли йиллардамиз. Мана кўряпсизлар, дунё шиддат билан ўзгаряпти. Коронавирус ҳамма давлатни, ҳамма халқни, хусусан, Ўзбекистонни ҳам синовдан ўтказди. Нималарга аҳамият қаратишимиз кераклигини англатди, камчиликларимизни, тиббиёт соҳасида катта нуқсонларимиз борлигини кўрсатди.
Биз, аввало, халқимизнинг саломатлигига эътибор қаратиб, тиббиётнинг қуйи поғонаси — қишлоқ врачлик пунктлари ривожланиши борасида қатор ишларни амалга оширяпмиз. Коронавирус бизнинг кўзимизни очди, бу билан қасдлашиб бўлмайди. Жуда катта ҳаракатларимиз билан буни жиловлашга интиляпмиз, аммо бу хавф-хатар ҳар куни биз билан юрибди.
Кўпчилигимиз яқинларимиз, қадрдонларимизни йўқотдик. Тажрибамиз бўлмади, даволана олмадик, эътибор бермадик. Ўтиб кетади, бу грипп экан, деб юрдик. Бу грипп эмас, ҳар доим ўзимизни эҳтиёт қилишимиз зарур.
Мавзуга доир: Шавкат Мирзиёев Ўзбекистонда коронавирус оқибатидаги ўлим даражаси «барибир юқори бўлгани»ни таъкидлади
Президент 2020 йилнинг май ойида ҳам «Коронавирус пандемияси кўзимизни очди», деб айтган эди. Давлат раҳбари ривожланган давлатлар тажрибаси асосида дастур ишлаб чиқиб, телемедицинани жадал ривожлантириш кераклигини таъкидлаганди.
Маълумот учун, Ўзбекистонда 1 июнь ҳолатига кўра, коронавирусга чалингани расман тан олинганлар сони 100 726 нафарга етди.
Эслатиб ўтамиз, Шавкат Мирзиёев ҳудудлар иқтисодиёти, аҳоли турмуш шароитлари билан яқиндан танишиш мақсадида 1 июндан буён Сурхондарё вилоятида бўлиб турибди.
Изоҳ (0)