Dunyoda koronavirusga chalinganlar soni 167 252 896 kishini tashkil qilmoqda. Jons Hopkins universiteti ma’lumotlariga qaraganda, AQSh (33,1 million kishi), Hindiston (26,7 million), Braziliya (16 million), Fransiya (5,9 million) va Turkiya (5,1 million) kasallanganlar soni bo‘yicha yetakchilik qilmoqda. Virus oqibatidagi o‘limlar esa 3 465 448 taga yetdi.
Foto: AP Photo
JSST COVID-19’dan ham halokatliroq virus paydo bo‘lishi haqida ogohlantirdi
Jahon sog‘liqni saqlash tashkiloti bosh direktori Tedros Gebreyesus dunyo yangi virus pandemiyasiga duch kelishi, u koronavirusdan ko‘ra yanada ko‘proq o‘limlarga olib kelishini istisno qilmadi. Bu haqda u Jahon sog‘liqni saqlash assambleyasining 74-sessiyasida aytib o‘tdi.
“Evolyutsiya hisob-kitoblariga ko‘ra, yangi virus paydo bo‘ladi, u hozirgidan ko‘ra yanada yuqumliroq va halokatliroq bo‘ladi”, — dedi Gebreyesus.
U mamlakatlar o‘rtasida birdamlik hamda ma’lumotlar, resurslar, texnologiyalar bilan ayirboshlash istagining yo‘qligini COVID-19 “pandemiyasining asosiy drayveri” deb atadi. Agar mamlakatlar shu yo‘ldan ketadigan bo‘lsa, ular yana virus bilan uchrashishga tayyor bo‘lmagan, xavfsiz va adolatsiz bo‘lgan dunyoga kelib qoladi, deya ogohlantirdi JSST rahbari. Dunyoni xavfsizlikda saqlash uchun umumiy ishtirok kerak, deya xulosa qildi Gebreyesus.
Mavzuga doir: JSST koronavirus pandemiyasi uchun to‘lqinlar tushunchasidan foydalanmaslikni maslahat berdi
Everest tog‘ida 100 kishi koronavirus bilan kasallandi
Everest tog‘idagi tayanch lagerida koronavirus bilan ommaviy kasallanish holati yuz berdi. Kamida 100 nafar alpinist va yordamchi xodimlar virusni yuqtirib oldi.
Avstriya ekspeditsiyasi rahbari Lukas Furtenbax aytishicha, uning guruhida yetti nafar gid koronavirusga topshirgan test musbat chiqqach, o‘tgan hafta o‘z ekspeditsiya safarini to‘xtatgan. Shu bilan birga, Nepal hukumati Everestda COVID-19 avj olganini hozircha rasman tan olmayapti.
“Qutqaruvchilar, sug‘urta kompaniyalari, shifokorlar, ekspeditsiya rahbarlari tomonidan tasdiqlangan bizga ma’lum holatlarning barchasini hisobga olganda… menda bularni isbotlay olishimiz uchun musbat javobli testlar bor. Tayanch lagerida bizda COVID-19 tashxisi tasdiqlangan kamida 100 kishi bor, shunda raqamlar, taxminan, 150 yoki 200 ta bo‘lishi mumkin”, — dedi Furtenbax.
Ta’kidlanishicha, bu mavsumda 408 nafar chet ellik alpinist Everestga ko‘tarilish uchun ruxsat olgan, ularga bir necha yuzlab sherplar (Sharqiy Nepal, Jomolungma tog‘i atroflarida, shuningdek, Hindistonda yashovchi xalq) va yordamchi personal ko‘maklashadi, ular esa tayanch lagerida apreldan buyon yashab kelmoqda.
Mavzuga doir: Xitoy Everest tog‘iga chiqishni taqiqlab qo‘ydi
Hindistonda “Sputnik V” vaksinasini ishlab chiqarish boshlandi
Rossiya to‘g‘ridan to‘g‘ri investitsiyalar fondi hamda Hindistondagi vaksina va dorilar ishlab chiqarishda yetakchi bo‘lgan kompaniyalardan biri Panacea Biotec Rossiyaning koronavirusga qarshi “Sputnik V” vaksinasini ushbu mamlakatda ishlab chiqarishni boshladi; dorini keng ko‘lamli ishlab chiqarish yozda yo‘lga qo‘yiladi.
Chiqarilgan ilk partiya Gamaleya nomidagi ilmiy-tadqiqot markaziga yetkaziladi va sifat jihatidan nazorat amalga oshiriladi.
“Sputnik V” Hindistonda 2021-yil 12-aprel kuni ro‘yxatdan o‘tkazilgan, 14-maydan aholini emlashda qo‘llanila boshlagan edi.
